“Ayolmi, erkakmi, jinoyat qilsa, teng javob berishi kerak”. Tanzila Norboyeva Gulnora Karimovaning qamoqda o‘tirganiga “ayol sifatida” munosabat bildirdi

Jinoyatchi qilgan jinoyati uchun — u ayol yoki erkakligidan qat’i nazar — qonun oldida javob berishi kerak. Bu haqda O‘zbekiston Senati raisi Tanzila Norboyeva 12-noyabr, payshanba kuni bo‘lib o‘tgan matbuot anjumanida qisqacha to‘xtalib o‘tdi.

Payshanba kuni Toshkentda O‘zbekiston Gender tenglikni ta’minlash masalalari bo‘yicha komissiyasi tomonidan matbuot anjumani o‘tkazildi. Unda, jumladan, Gulnora Karimova bilan bog‘liq holat yuzasidan ham fikr almashildi, deya xabar bermoqda “Daryo” muxbiri Musulmonbek Ibrohimov.

Xususan, Gulnora Karimova koronavirusga chalingan bo‘lishi mumkinligi haqidagi xabarlarga munosabat bildirarkan, IIV Huquqbuzarliklar profilaktikasi bosh boshqarmasi boshlig‘i o‘rinbosari, polkovnik Umida Abdullayeva bu gaplar asossiz ekanligini ta’kidladi.

Shuningdek, Senat raisi Tanzila Norboyeva esa Gulnora Karimovaning qamoqda saqlanishiga ayol sifatida munosabati qanday ekani haqidagi savolga javob berdi.

“Gender tengligi haqida gapiryapmiz — ayolmi, erkakmi, jinoyat qilsa, teng javob berishi kerak”, — deb ta’kidlagan Tanzila Norboyeva.

Qayd etish joiz, Gulnora Karimova jinoyat ishlari bo‘yicha Toshkent viloyati sudining 2017-yil 18-dekabrdagi hukmi bilan 10 yilga ozodlikdan mahrum etilgan (bu Gulnora Karimovaga nisbatan qo‘zg‘atilgan bir necha jinoyat ishlaridan faqat biri bo‘yicha chiqarilgan hukm), biroq sudning 2018-yil 1-iyuldagi ajrimiga muvofiq, “insonparvarlik nuqtayi nazaridan hamda mahkuma jinoiy yo‘l bilan orttirilgan pul mablag‘larini qaytarish va davlatga yetkazilgan zararni qoplash majburiyatlarini o‘z zimmasiga olganligini e’tiborga olgan holda”, unga tayinlangan jazoni 5 yillik uy qamog‘iga almashtirilgan.

Shundan so‘ng Gulnora Karimova, ma’lum bir cheklovlarga rioya etish sharti bilan, qizi Imon Karimovaning Toshkentdagi uyida yashay boshlagan. Biroq jazoni o‘tash tartibi va shartlarini qasddan buzganligi uchun (e’tiborga molik tomoni, bu belgilangan tartibning birinchi marta buzilishi bo‘lmagan) u jinoyat ishlari bo‘yicha Yashnobod tuman sudi qarori bilan 2019-yil 5-mart kuni uy qamog‘idan Zangiota tumanidagi 21-son umumiy tartibdagi koloniyaga o‘tkazilgan. Ijtimoiy tarmoqlarda tarqalgan turli xabarlar sabab, Karimovaning qamoqxonadagi sharoitlari yuzasidan Ombudsman, Adliya vazirligi va IIV o‘rganish va suhbatlar o‘tkazgan edi.

Avvalroq, oktabr oyida Tanzila Norboyeva Toshkent viloyatining sobiq bosh infeksionisti Guljahon Yo‘ldosheva ishi bo‘yicha munosabat bildirarkan, ish bo‘yicha sud hukmi chiqquniga qadar uning “ayol kishi, kichkina bolasi borligini e’tiborga olib, hozircha qamoqda olmaslik ham mumkin” bo‘lganini ta’kidlagan edi (Yo‘ldosheva xonim Gender tenglikni ta’minlash masalalari bo‘yicha komissiyasi a’zosi Saida Mirziyoyevaning murojaatidan so‘ng uy qamog‘iga o‘tkazilgan edi).

Noyabr oyi boshida ijtimoiy tarmoqlarda Asalhoney nomi bilan tanilgan Asal Xo‘jayeva Ma’muriy javobgarlik to‘g‘risidagi kodeksning haqorat qilish va mayda bezorilik bo‘yicha aybdor deb topilib, besh sutka ma’muriy qamoq bilan jazolangan, biroq oradan ko‘p o‘tmay u Toshkent shahar Ma’muriy sudi Kassatsiya instansiyasi qarori bilan voyaga yetmagan farzandi borligi va uning yagona boquvchisi bo‘lgani bois ma’muriy qamoqdan ozod qilingan edi.