Октябрь ойида ижтимоий тармоқлар ва ОАВда белгиланган жазо муддатини Зангиотадаги колонияда ўтаётган Гулнора Каримованинг саломатлиги ёмонлашгани, у ўпка яллиғланиши ташхиси билан санитария қисмига ётқизилгани, у коронавирусга чалинган бўлиши мумкинлиги ҳақида хабарлар тарқалган эди. Бу ҳақда, жумладан, Гулнора Каримованинг қизи Имон Каримова томонидан юритилиши тахмин қилинадиган Instagram’даги @iman.k17 аккаунтида ҳам хабар қолдирилган.
12 ноябрь куни бўлиб ўтган матбуот анжуманида мутасаддилар Гулнора Каримованинг коронавирусга чалингани, аҳволи оғирлашгани ёки ўз жонига қасд қилгани ҳақида тарқалган хабарлар қанчалик ҳақиқатга мослиги ҳақида саволга жавоб берди. Хусусан, Сенат раиси Танзила Норбоева бу гапларни «миш-мишлар» деб атади.
«Буларнинг бари, айтганингиздек, миш-мишлар, асосланмаган фактлар», — деди Сенат раиси Танзила Норбоева журналистга жавобан. «Ўз жонига қасд қилди деган ёки бошқа нохуш ҳолат ҳақидаги гаплар асоссиз. Гулнора Каримова суд томонидан белгиланган жазо муддатини ўтамоқда», — дея қўшимча қилди ИИВ полковниги Умида Абдуллаева.
Изоҳ (0)