Беларусь атом электр станцияси (БелАЭС) электр энергиясини ишлаб чиқаришни вақтинча тўхтатди. Бу ҳақда БелАЭСга таяниб, «Интерфакс» хабар берди.
Қайд этилишича, АЭС қачон фаолиятини қайта тиклаши аниқ эмас. БелАЭС энергия ишлаб чиқаришни тўхтатганлиги ҳақидаги маълумот 8 ноябрь куни пайдо бўлди.
Норасмий маълумотларга кўра, бунга генератор билан боғлиқ бўлган блоклардан бирида кучланиш трансформаторларининг ишламай қолиши сабаб бўлган. Ушбу ҳодиса радиация оқиши нуқтаи назаридан ҳеч қандай хавф туғдирмаслиги таъкидланди.
Беларусь президенти Александр Лукашенко 7 ноябрь куни Островец шаҳрида БелАЭСни расман очиб берган эди.
«Тарихий дақиқалар: мамлакат атом энергетикаси державасига айланмоқда», – деган эди президент очилиш маросимида.
Ҳозирда БелАЭС биринчи энергия блокининг қуввати 400 мегаваттни ташкил этади. Келажакда у 1190 мегаваттгача кўтарилиши режалаштирилган. АЭС 2021 йилнинг биринчи чорагида тижорат мақсадларида фойдаланишга топширилиши кутилмоқда.Маълумот учун, электростанция Россия ҳамда Беларусь ўртасида тузилган келишувга мувофиқ «Росатом» тузилмасида 2011 йилдан 2019 йилга қадар қурилган эди. «Росатом» вакилларининг маълум қилишича, Жиззах вилояти Фориш туманидаги Тузкон кўли яқинида қурилажак Ўзбекистондаги илк атом электр станцияси ҳам худди шу лойиҳа бўйича барпо этилади.
Аввалроқ Беларусдаги АЭСда авария содир бўлса, Литвада Вилнюс аҳолисига бепул ёд тарқатилиши ҳақида хабар берилган эди.
Изоҳ (0)