Давлат солиқ қўмитаси меҳнат муҳожирларининг ўз-ўзини банд қилган шахслар сифатида 2021 йилдан бошлаб мажбурий солиққа тортилиши ҳақида тарқалган хабарларни ишончсиз, нотўғри маълумот деб атади. Қўмита ахборот хизматининг қайд этишича, ўз-ўзини банд қилган шахс ихтиёрий равишда ижтимоий солиқни тўлаши мумкин.
Эслатиб ўтамиз, 2020 йил 15 сентябрдаги Президент қарорида 2021 йил 1 январдан бошлаб ташкиллаштирилган меҳнат миграцияси йўли билан хорижда вақтинча меҳнат фаолиятини амалга ошириш ўзини ўзи банд қилган шахслар шуғулланиши мумкин бўлган фаолият (ишлар, хизматлар) турларига тенглаштирилиши ва ўзини ўзи банд қилган шахслар учун белгиланган солиқларни тўлаш ҳамда пенсия миқдорини ҳисоблаш тартиби қўлланилиши белгиланган.
ДСҚнинг қайд этишича, Солиқ кодексининг 369-моддасида қонун ҳужжатларида белгиланадиган тартибда ўзини ўзи банд қилган шахсларнинг меҳнат фаолияти натижасида олинган даромадлар жами даромадга киритилмаслиги белгиланган. Ўз-ўзини банд қилган шахс ихтиёрий равишда Пенсия жамғармасига ижтимоий солиқ тўлайди. Унинг миқдори 2020 йил учун камида базавий ҳисоблаш миқдорининг 50 фоизи этиб белгиланган ва айни вақтда ушбу солиқ 111 500 сўмни ташкил қилмоқда.
«Шу билан бирга, агар чет элда вақтинчалик меҳнат фаолиятини амалга ошираётган фуқаролар Ўзбекистонда пенсия ва иш стажига эҳтиёж сезмаса, унда Пенсия жамғармасига ижтимоий солиқ тўлашининг ҳожати йўқ», — дейилади ДСҚ маълумотида.
Қўмита ахборот хизмати ушбу чоранинг меҳнат муҳожирларини ижтимоий қўллаб-қувватлашга қаратилгани, келажакда уларни моддий ҳимоя қилиш бўйича давлат кафолати бўлиб хизмати қилишини қайд этган.
Изоҳ (0)