АҚШ президенти Дональд Трамп судда овоз бериш билан боғлиқ ишни кўриб чиқиш кутилганидек натижа бермаса, ўзининг сайловлардаги мағлубиятини тан олишга рози бўлди. Бу ҳақда Fox News телеканали ўз манбаларига таяниб хабар берди, деб ёзади «РБК».
Fox News ёзишича, «судда иш кўриб чиқилганидан кейин унинг ғалаба қозониш имконияти йўқлиги» ойдинлашса, Трамп ён босишга тайёр бўлади. The New York Times газетаси Трампнинг ёрдамчиларига таяниб қайд этишича, яқин орада президент рақиби Жо Байденнинг ғалабасини тан олмоқчи эмас.
Айни пайтда NYT, CNN, Fox News ва Associated Press прогнозлари бўйича, Байден сайловчилар коллегиясининг ғалаба учун зарур бўлган 270 дан ортиқ овозини қўлга киритиб бўлган. Аммо Трамп ғалаба қозонганини даъво қилишда давом этиб, сайловларда «хунук нарсалар» содир бўлганини, овозлар санаб чиқилаётган баъзи биноларга эса кузатувчилар қўйилмаганини айтмоқда.
Трампнинг сайловолди штаби ва Республикачилар партияси Миллий қўмитаси Аризона штатидаги Марикопа округи устидан судга шикоят аризаси берган. Трамп кампаниясининг бош ҳуқуқий маслаҳатчиси Мэтт Морган маълум қилишича, округда сайловчилар шахсан келиб берган овозлар нотўғри ҳисобланган.
Аввалроқ Трампнинг шахсий адвокати Руди Жулиани амалдаги президент жамоаси Байденнинг Пенсильвания асосий штатидаги ғалабаси устидан ҳам судга шикоят қилмоқчи эканлигини айтганди. «Бизни ушбу бюллетенларнинг ҳақиқийлигини текшириш ҳуқуқидан маҳрум қилишди», — деди Жулиани.
АҚШда президент сайловлари 3 ноябрь куни бўлиб ўтди, аммо уларнинг якуний натижалари почта орқали овоз берилганлиги ва сайловга рекорд даражада кўп (аввалги йиллардагидан 15 миллионга кўп) сайловчилар келганлиги туфайли кечикди. Дастлаб баъзи штатларда, шу жумладан, Висконсин ва Жоржияда узоқ вақт давомида Трамп етакчилик қилиб турди, аммо овозларнинг сўнгги қисмини ҳисоблаш чоғида устунлик Байден томонга ўтди. Трамп унинг етакчилиги «сеҳрли тарзда» ғойиб бўлганини айтиб, буни «жуда ғалати» деб атади.
Изоҳ (0)