Дания фермаларидаги қоракўзанларда (норка) коронавирус аниқлангани боис уларнинг барчаси ўлдирилиши ҳақида хабар берилганди. Жаҳон соғлиқни сақлаш ташкилоти (ЖССТ) маълум қилишича, Даниядан ташқари, Испания, Италия, АҚШ, Нидерландия ва Швецияда ҳам қоракўзанлар коронавирус билан касаллангани аниқланган. Бу ҳақда Meduza хабар қилмоқда.
Фото: РИА Новости
ЖССТ маълумотларига кўра, барча ҳолатларда вирус ҳайвонларга одамлардан юққан. Бироқ, ташкилотнинг таъкидлашича, улардан одамга юқиши эҳтимоли мавжуд.
ЖССТ барча биохавфсизлик чораларини кузатиш ва қоракўзанлардаги вирус мутациясини ўрганишни давом эттириш учун ҳайвонларни, биринчи навбатда қоракўзанларга эга мўйнали фермер хўжаликлари устидан назоратни кучайтиришни тавсия қилади.
Дания ҳукумати 5 ноябрь куни ҳайвонларда мутацияга учраган COVID-19 вируси топилганидан кейин мамлакатдаги барча мўйнали фермер хўжаликларида қоракўзанларни йўқ қилишларини маълум қилди. Гап тахминан беш миллион қоракўзан ҳақида кетмоқда. Дания дунёдаги энг йирик қоракўзан мўйнасини етказиб берувчи давлат ҳисобланади.
Илгари Испания ва Голландиядаги фермер хўжаликларида коронавирус юқтирган қоракўзан ҳақида маълум бўлган. Умуман олганда, ушбу мамлакатларда 110 мингдан ортиқ қоракўзанлар йўқ қилинди.
Данияда қоракўзанлар орасида коронавирус июнь ойида аниқланган эди. Дания давлат қон зардоблари инситути директори Каре Молбакнинг таъкидлашича, энг ёмон сценарий юзага келса, «Даниядан тарқалувчи янги пандемия» бошланиши мумкин.
Эслатиб ўтамиз, апрель охирларида АҚШда илк бор мушукларда ҳам коронавирус қайд этилганди. Ундан аввалроқ эса Нью-Йоркдаги Бронкс ҳайвонот боғида йўлбарс коронавирус юқтириб олгани ҳақида хабар берилган эди. Шунингдек, май ойида Нидерландияда коронавирус қоракўзандан инсонга юқиши аниқланган.
