Жо Байден АҚШнинг сайланган президенти деб эълон қилинди

АҚШ оммавий ахборот воситалари, хусусан, Associated Press, CNN, The New York Times, ABC News, Fox News ва бошқалар 7 ноябрь, шанба куни Жо Байденни АҚШнинг сайланган президенти деб эълон қилди. Президент сайлови 3 ноябрь куни ўтиб бўлган, бироқ овозларни ҳисоблаш жараёни ҳамон давом этмоқда.

ОАВ ҳисоб-китобларига кўра, президентликка номзоди Демократик партиядан кўрсатилган собиқ вице-президент Жо Байден Пенсильвания штатида ғалаба қозонган ва президент сайловида ғолиб чиқиш учун танловчиларнинг камида 270 та овози керак бўлган ҳолатда 273 та овоз эгасига айланган. Айни вақтда, Fox News’нинг ёзишича, Байден жами 290 та овозни қўлга киритган.

АҚШнинг амалдаги президенти Дональд Трамп эса, ОАВ ҳисоб-китобларига кўра, ҳозирча танловчиларнинг 213 та ёки 214 та овозини қўлга киритган. Трампнинг сайлов штаби вакиллари улар сайлов натижалари устидан судга шикоят қилишини яна бир бор маълум қилди. Трампнинг баёнотида таъкидланишича, Байден «ўзини ёлғондан ғолибдек кўрсатиб, шошилмоқда» ва «пойганинг тугашига ҳали анча бор».

Айни вақтда, медиа-магнат Руперт Мёрдокка тегишли ва Трамп ҳокимият тепасида бўлган ўтган вақт давомида уни қўллаб-қувватлаб келган ОАВлар, айнан — Fox News, Wалл Street Жоурнал ва New York Post ҳам ўз оҳангини ўзгартириб, амалдаги президентни мағлубиятни тан олишга, шу йўл билан қилган ишлари ва миллионлаб тарафдорларининг ҳурматини сақлаб қолишга чақирмоқда.

Танловчилар ҳайъати президентни расман 14 декабрь куни сайлайди.

The New York Times’нинг ёзишича, 77 ёшли Байден 20 январь куни АҚШнинг 46-президенти сифатида қасамёд қилади ва ушбу лавозимни эгаллаган тарихдаги энг кекса шахсга айланади.

CNN маълумотига кўра, Жо Байден яқин вақт ичида миллатга мурожаат билан чиқиш қилади. У аллақачон баёнот тарқатиб, унга ва сайланган вице-президент Камала Харрисга билдирилган ишонч учун Америка халқига миннатдорлик билдирган.

«Америка, буюк мамлакатимиз етакчиси сифатида мени танланганингиз мен учун катта шараф. Бизни олдинда мураккаб иш кутиб турибди, бироқ сизга шуни ваъда қиламан: мен — менга овоз берган-бермаганлигингиздан қатъи назар — барча америкаликлар учун президент бўламан», — деб ёзди Жо Байден Twitter’даги саҳифасида.

The New York Times’нинг қўшимча қилишича, сайланган вице-президент Камала Харрис ушбу лавозимдаги «биринчи аёл, биринчи қора танли аёл, биринчи келиб чиқиши ҳинд бўлган америкалик аёл ва муҳожирлар қизи бўлган биринчи аёл» сифатида тарихга киради.