Тўрақўрғон бандликка кўмаклашиш маркази директори пандемия даврида 325,5 млн сўм маблағни талон-торож қилган — бош прокурор

Сўнгги икки йилда Ўзбекистон Бандлик ва меҳнат муносабатлари вазирлиги тизимидаги 57 нафар ходим турли коррупциявий жиноятлари учун жавобгарликка тортилган. Бу ҳақда 7 ноябрь куни Бош прокуратурада ташкил этилган коррупция масалаларига оид идоралараро йиғилишда маълум қилинди.

Бош прокурор Ниғматилла Йўлдошевнинг маълум қилишича, Тўрақўрғон туман бандликка кўмаклашиш маркази директори Эгамов аҳоли бандлигини таъминлаш учун ажратилган бюджет маблағларини талон-торож қилишнинг ўзига хос схемасини кашф этди.

У қўл остидаги 3 нафар ходими билан жиноий тил бириктириб, дастлаб, 2019 йилги пахта мавсумида тўрақўрғонлик 327 нафар ишсиз Тошкент ва Жиззах вилоятларига теримга жалб этилганлиги, уларга жамоат ишлари жамғармасидан 1 миллион сўм мукофот пули берилиши ҳақида сохта ҳужжатларни тузиб, кейинчалик сохта ҳужжатларни банкка тақдим қилиб, мукофот пули сифатида жами 276,4 миллион сўм нақд пулларни олган.

Шунингдек, улар пандемия шароитида қурилиш, қишлоқ хўжалиги ва бошқа жамоат тадбирларига жалб қилинган фуқароларга иш ҳақлари жамоат ишлари жамғармасидан тўланиши белгиланганидан фойдаланиб, ушбу маблағларни ҳам ўзлаштириш мақсадида турмуш ўртоғи, синглиси, ҳайдовчиси ва бошқа яқинлари номига 6 та сохта фирмаларни ташкил қилган.

Ушбу фирмаларга пандемия даврида 179 нафар ишсиз фуқаро жамоат ишларига юборилганлиги ҳақида сохта ҳужжатларни тузиб, фирмалар ҳисоб рақамига гўёки иш ҳақида сифатида 325,5 миллион сўм маблағни ўтказиб, турли шахслар номига очилган пластик карталарга тушириб талон-торож қилган. Эгамов жиноий йўл билан топилган маблағлар ҳисобига қариндошлари номига 2 та Lacetti ва 2 та Damas автомашинасини сотиб олиб, легаллаштирган.

«Ҳозирда Эгамов ва унинг жиноий шериклари қамоққа олинган, тергов ўтказилмоқда. Бу каби мисолларни ҳам яна барча ҳудудлардан кўплаб келтиришимиз мумкин», — дейди бош прокурор.

Аввалроқ бош прокурор грим учун ажратилган маблағга «Ўрикзор»дан арзон косметика сотиб олган Маданият вазирлигидаги жиноий схема ҳақида маълумот берганди. Шунингдек, Ўзбекистонда икки йил ичида салкам 2000 нафар мансабдор шахс коррупциявий жиноятлари учун жиноий жавобгарликка тортилгани маълум бўлганди.