To‘raqo‘rg‘on bandlikka ko‘maklashish markazi direktori pandemiya davrida 325,5 mln so‘m mablag‘ni talon-toroj qilgan — bosh prokuror

So‘nggi ikki yilda O‘zbekiston Bandlik va mehnat munosabatlari vazirligi tizimidagi 57 nafar xodim turli korrupsiyaviy jinoyatlari uchun javobgarlikka tortilgan. Bu haqda 7-noyabr kuni Bosh prokuraturada tashkil etilgan korrupsiya masalalariga oid idoralararo yig‘ilishda ma’lum qilindi.

Bosh prokuror Nig‘matilla Yo‘ldoshevning ma’lum qilishicha, To‘raqo‘rg‘on tuman bandlikka ko‘maklashish markazi direktori Egamov aholi bandligini ta’minlash uchun ajratilgan budjet mablag‘larini talon-toroj qilishning o‘ziga xos sxemasini kashf etdi.

U qo‘l ostidagi 3 nafar xodimi bilan jinoiy til biriktirib, dastlab, 2019-yilgi paxta mavsumida to‘raqo‘rg‘onlik 327 nafar ishsiz Toshkent va Jizzax viloyatlariga terimga jalb etilganligi, ularga jamoat ishlari jamg‘armasidan 1 million so‘m mukofot puli berilishi haqida soxta hujjatlarni tuzib, keyinchalik soxta hujjatlarni bankka taqdim qilib, mukofot puli sifatida jami 276,4 million so‘m naqd pullarni olgan.

Shuningdek, ular pandemiya sharoitida qurilish, qishloq xo‘jaligi va boshqa jamoat tadbirlariga jalb qilingan fuqarolarga ish haqlari jamoat ishlari jamg‘armasidan to‘lanishi belgilanganidan foydalanib, ushbu mablag‘larni ham o‘zlashtirish maqsadida turmush o‘rtog‘i, singlisi, haydovchisi va boshqa yaqinlari nomiga 6 ta soxta firmalarni tashkil qilgan.

Ushbu firmalarga pandemiya davrida 179 nafar ishsiz fuqaro jamoat ishlariga yuborilganligi haqida soxta hujjatlarni tuzib, firmalar hisob raqamiga go‘yoki ish haqida sifatida 325,5 million so‘m mablag‘ni o‘tkazib, turli shaxslar nomiga ochilgan plastik kartalarga tushirib talon-toroj qilgan. Egamov jinoiy yo‘l bilan topilgan mablag‘lar hisobiga qarindoshlari nomiga 2 ta Lacetti va 2 ta Damas avtomashinasini sotib olib, legallashtirgan.

“Hozirda Egamov va uning jinoiy sheriklari qamoqqa olingan, tergov o‘tkazilmoqda. Bu kabi misollarni ham yana barcha hududlardan ko‘plab keltirishimiz mumkin”, — deydi bosh prokuror.

Avvalroq bosh prokuror grim uchun ajratilgan mablag‘ga “O‘rikzor”dan arzon kosmetika sotib olgan Madaniyat vazirligidagi jinoiy sxema haqida ma’lumot bergandi. Shuningdek, O‘zbekistonda ikki yil ichida salkam 2000 nafar mansabdor shaxs korrupsiyaviy jinoyatlari uchun jinoiy javobgarlikka tortilgani ma’lum bo‘lgandi.