«Заковат» кўрсатувида янги бошловчи иш бошлади. Абдурасул Абдуллаевга нима бўлди?

Сўнгги вақтларда «Заковат» интеллектуал телеўйини бир неча йиллик бошловчисининг иштирокисиз эфирга узатилаётгани кўпчиликни таажжублантирмоқда. Кўрсатув муаллифи ва бошловчиси Абдурасул Абдуллаев ўзи асос солган лойиҳани тарк этдими? Журналист Наргиза Муродова бу саволга жавоб олиш учун Абдурасул Абдуллаев билан боғланди.

«Саломатлигим билан боғлиқ жиддий вазият сабаб сўнгги кўрсатувларда иштирок этолмадим. Яқиндагина юрак билан боғлиқ жиддий жарроҳлик операциясини бошдан ўтказдим. Шу боис ‘Заковат’ кўрсатуви бошловчилигини шогирдим Саидкамол Абдураззоқовга топширдим. Насиб қилса, декабрь ойининг сўнгги кунларида эфирга қайтаман», —дейди Абдурасул Абдуллаев.

Бошловчининг таъкидлашича, айни кунларда унинг соғлиғи билан боғлиқ хавф йўқ. Фақатгина муолажаларни ўз вақтида бажарса ва шифокор тавсияларига амал қилса кифоя.

Маълумот учун, 62 ёшли Абдурасул Абдуллаев 35 йилдан бери Ўзбекистон миллий телерадиокомпанияси тизимида фаолият юритиб келади. Даставвал радиода сухандон амалиётчиси лавозимида иш бошлаган Абдурасул Абдуллаев олий тоифали сухандон даражасигача етиб борди. 1996 йилда телевидениеда муҳаррир сифатида ўз фаолиятини давом эттирди.

«Заковат» интеллектуал телеўйинининг илк сони 2001 йилда, Наврўз байрами арафасида эфирга узатилган. Ўтган давр мобайнида ушбу кўрсатув миллионлаб телетомошабинлар эътиборини жалб этди, мухлислар қалбига йўл топа олди. Кўрсатув ташкил этилганидан бери ўнлаб истеъдодли, билимдон ёшларни кашф этди.

Абдурасул Абдуллаев 2009 йилда «Меҳнат шуҳрати» ордени билан мукофотланган.