Ҳарорат совишни бошлаганда шапка кийиш керак, уни ярашмайди дейиш эса шунчаки баҳона. Сиз юз шакли ва кийиниш услубингизга мосласангиз, моделлар орасидан ярашадигани топилади, асосийси эса нафақат образингиз дидли, балки саломатлигингиз ҳам жойида бўлади.
Ҳаддан ортиқ ингичка ёки юпқа шапка
Бундай шапка биринчидан совуқдан сақламайди, иккинчидан соч турмагини пачоқ қилади. Юпқа модель бошни сиқиб туради ва қон айланишига зарар етказади, оқибатда нафақат бош оғриши, балки қазғоқ тушиши ҳам кузатилади.
Шапкани пешонани катта очиб кийиш
Чўзинчоқ ва тўртбурчак шаклли юз эгаларига шапкани пешонани катта қилиб очган ҳолда кийиш тавсия қилинмайди. Бундай усулда кийиш пешонани яна ҳам катта, юз шаклини хунук кўрсатади. Шу сабаб уни пастроқ тушириб кийиш ёки думалоқроқ моделларга эътибор қаратиш тавсия қилинади.
Шапкани бостириб кийиш
Шапкани қошга яқин қилиб кийиш юзнинг каттароқ кўринишига олиб келади ва бу, айниқса, ёноқлари бўртган қизларга ярашмайди.
Шаклсиз шапка
Шакли йўқ ва ҳар томонга қийшайиб кетадиган шапка кийиш ҳам хато. Бундай модель образни арзон ва дидсиз кўрсатади.
Безакли шапка
Тош, мунчоқ, кўз ва бошқа безаклари бор шапкаларни гардеробдан олиб ташланг. Бундай шапкалар сизни кийиниш борасида дидсиз кўрсатади ва кийимларга мос тушмайди. Қиммат ва сифатли палто ёки шуба кийган тақдирингизда ҳам, бундай шапка сизни кўнгилдагидек кўрсатмайди.
Кепкали, тўқилган шапка
Бундай моделлар баланд пошнали кроссовка, капрон устидан кийилган жинси шорти сингари ғалати кўринади. Харид борасида минимал услубдаги, юз шаклига ярашадиган моделларга эътибор қаратинг.
Шапка сифати
Шапка сифати, матосига эътибор беринг. Иплари титилган «катишка» бўладиган бўлса, уни киймаганингиз яхши.
Комплект шапка
Шарф, шапка ва қўлқоп комплекти, гардеробнинг ранг баранг бўлмаслиги фантазия чекланишига сабабчи бўлади. Яхшиси, уларнинг ҳар бири учун алоҳида-алоҳида моделларни харид қилинг.
Кийиниш услубига мос тушмаслик
Сиз ёқтирганингиз учунгина маълум моделни ҳамма ерга киявериш ярамайди. Масалан, попукли шапкани жиддий услубдаги палто, чарм ботилён билан кийиб, ўзингизни топган-тутганини кийиб олгандек қилиб кўрсатасиз.
Изоҳ (0)