Гўзаллик қурбонлик талаб қилади деганда, мукаммал образ учун кўп вақт, асаб ва пул сарфланиши кўз олдига келади. Аммо мода кетидан қувиш оқибатида нафақат ҳамён, балки саломатликка ҳам зарар етказиб қўйиш мумкин. Тренддаги ҳамма кийим-кечак ҳам кўринганидек беозор бўлавермайди. Саломатлик билан боғлиқ салбий оқибатлар кузатилмаслиги учун кийиниш борасида эътиборли бўлиш даркор.
Ёпишиб турадиган шимлар
Ҳаддан ортиқ даражада тор бўлган жинси ёки шим қон айланишига салбий таъсир қилади. Бундай кийимни кўп кийиш эса мушак ва қон-томир касалликларини келтириб чиқаради, варикоз ва целлюлит пайдо бўлиш хавфи кучаяди. Шуларни инобатга олган ҳолда skinny бичимли шимлардан буткул воз кечилмаса ҳам камроқ кийиш тавсия қилинади.
Баланд пошнали ва таг қисми жуда паст оёқ кийимлар
Пойабзал борасида олтин оралиққа амал қилган яхши. Баланд пошнали туфли нафақат оёқлар, балки умуртқа поғонасига таъсир қилиб, сколиоз, тос суяги деформацияси, варикоз ва ички аъзолар фаолиятига таъсир кўрсатади. Ўз навбатида ҳаддан ортиқ ингичка оёқ кийим кийиш ҳам тавсия этилмайди. Чунки бундай оёқ кийимда юриш давомида тана оғирлиги тизза ва оёқ кафтларига тушади, оғриқ ҳамда умуртқа билан боғлиқ муаммолар пайдо бўлади. Ортопедлар 4-5 см баландликдаги пойабзал кийишни маслаҳат беради.
Қуёшдан ҳимояловчи кўзойнак
Қуёшдан ҳимояловчи кўзойнаклардан тўғри фойдаланиш керак. Кўпчилик кўзойнакни кечки вақт, транспорт ёки сунъий ёритилган жойларда ҳам тақади. Хира чироқ ва тўқ линзалар кўзларни зўриқтиради бу эса кўзнинг ички босими ошиши, шунингдек, катаракта ривожланишига олиб келади.
Бир елкага тақиладиган сумка
Сумканинг доим бир елкага тақилиши умуртқанинг зўриқишига сабаб бўлади. Кейинчалик умуртқа ва бўйинда оғриқ пайдо бўлиши, букчайиш, скелетда деформация кузатилади. Бу каби оқибатлардан қочиш учун сумкани бир елкадан бошқасига алмаштириб тақиш керак.
Капрон колготка билан калта юбка кийиш
Совуқ ҳавода бундай кийиниш ички аъзоларда яллиғланиш пайдо бўлиши, шунингдек, шамоллаш учун шароит яратиши мумкин. Совуқ ҳавода қон айланиши секинлашиб, тери эластиклиги ёмонлашади, ёғларнинг қават-қават бўлиб тўпланиши — целлюлитга ҳам сабабчи бўлади.
Легинслар
Олимларнинг маълумотига қараганда, бир қарашда зарар етказмайдигандек туюлган легинслар терининг бўшашиб, целлюлит ва ёғ қатламларининг пайдо бўлишига олиб келади.
Таг қисми резинкали кедалар
Қулайлигига қарамай, кўтарилган қисми (подёми) йўқлиги сабаб, кедалар оёқлар учун хавфли ҳисобланади. Уларни мунтазам кийиш ясси оёқлик ёки таянч-ҳаракат тизими касалликларини келтириб чиқаради.
Сифатсиз тақинчоқ
Сифатсиз тақинчоқлар аллергия ва терида ўзгаришлар келтириб чиқариши мумкин. Бундан ташқари, арзон тақинчоқлар токсик хусусиятга эга қисмлардан ташкил топган бўлиши эҳтимоли ҳам йўқ эмас.
Оёқ ўлчамига мос бўлмаган пойабзал
Пойабзал оёқ ўлчамига мос бўлмаганда юриш ноқулай бўлибгина қолмай, тирноқнинг эт орасига ўсиши, пай чўзилиши ёки суяклар деформациясига сабаб бўлади.
Сифатсиз матолардан тикилган либослар
Бўялган, ҳаво ўтказмайдиган, сифатсиз матодан тикилган кийимлар саломатлик учун хавфли. Бунда камида тери қичиши ёки аллергиянинг ривожланиши ва қўзғаши кузатилиши мумкин. Харид давомида кийимнинг кўринишидан ташқари, мато сифати ва ҳаво ўтказишига эътибор беринг.
Изоҳ (0)