Шавкат Мирзиёев фармонига асосан давлат корхоналарини трансформация қилиш ва давлат активларини хусусийлаштириш бўйича чоралар белгилангани хабар берилган эди. Spot’нинг ёзишича, хусусийлаштириладиган корхоналар орасида ГУМ ва Тurkuaz номи билан танилган «Тошкент савдо маркази» ҳам бор.
Май ойида E-аукцион сайтида тегишли лот пайдо бўлган бўлиб, унда бошланғич нархи 303,5 миллиард сўм деб кўрсатилган. Орадан уч ойдан ортиқ вақт ўтгач унга талабномаларнинг камлиги туфайли мажмуа нархи 30 миллиард сўмга — 273,1 миллиард сўмгача туширилди.
Шундан сўнг сентябрь ойи охирида ўтказилган кимошди савдосида бир инвестор — «Буюк Эко Савдо» МЧЖдан ариза қабул қилинди (2019 йилда ташкил этилган, ёғоч ва қурилиш материаллари улгуржи савдоси билан шуғулланади).
«Таклиф фақат битта иштирокчидан тушганлиги сабабли, кимошди савдоси тўғрисида якуний қарор Давлат тендер комиссиясининг қарори асосида қабул қилинади. Ҳозир зарур ҳужжатлар тайёрланмоқда», — деб маълум қилган Давлат активларини бошқариш агентлиги матбуот хизмати.
«Тошкент савдо маркази» — бутун иш фаолият тарихидаги энг йирик ва энг қиммат лотлардан бири. Ушбу савдо маркази майдони 3,9 гектарни ташкил этади. Бино майдони эса 40,7 минг квадрат метр. Бино дастлаб Давлат универсал дўкони (ГУМ) сифатида қурилган. 2000 йилларнинг бошидан 2011 йилгача Тurkuaz дўкони шу ерда жойлашган.
2011 йилда Тurkuaz ёпилган, туркиялик тадбиркорлар мамлакатдан чиқариб юборилди. Ҳукумат бунга бир қанча қонунбузарликлар содир этилганини сабаб қилиб кўрсатган. Туркиялик тадбиркорлар 2012 йил апрелида мусодара қилинган мол-мулкни қайтариб бериш талаби билан халқаро арбитражга мурожаат қилган. Тurkuaz иши ҳали ҳам давом этмоқда.
Изоҳ (0)