Хоразмда МЧЖ раҳбари 3 гектар ерни бир фуқаро номига расмийлаштириб бериш учун 40 минг доллар пора олган вақтида ушланди

Бош прокуратура ҳузуридаги Иқтисодий жиноятларга қарши курашиш департаменти Хоразм вилояти бошқармаси ва Давлат хавфсизлик хизмати вилоят бошқармаси ходимлари ҳамкорлигида ер савдоси билан боғлиқ яна бир жиноий ҳаракатга чек қўйилди. Бу ҳақда ЎзА хабар берди.

Урганч туманида фаолият юритувчи МЧЖ раҳбари шу туманда яшовчи 1990 йилда туғилган фуқаронинг ишончига кириб, жамиятга чорвачилик учун ажратилган ер майдонидан 3 гектарини Урганч тумани ҳокимлиги захирасига қайтариб, унинг номига расмийлаштириб беришни ваъда қилган.

Жамият раҳбари иш тез ва муаммосиз ҳал бўлиши эвазига фуқародан 40 минг доллар талаб қилган.

Урганчлик фуқаро ушбу фирибгарлик ҳолати юзасидан ҳуқуқни муҳофаза қилувчи органларга ариза билан мурожаат қилган. Унга асосан ўтказилган тезкор тадбирда жамият раҳбари фуқародан 3 гектар ер майдони эвазига талаб қилган 40 минг долларни олган вақтида ашёвий далил билан ушланган.

Ҳолат юзасидан жамият раҳбарига нисбатан Жиноят кодексининг 168-моддаси 4-қисми (жуда кўп миқдорда содир этилган фирибгарлик) билан жиноят иши қўзғатилиб, тергов ҳаракатлари ўтказилмоқда.