Самарқанд вилоятида 2 йил давомида 12 нафар фуқарони фоҳишалик билан шуғулланишга мажбур қилган аёл қўлга олинди, дея хабар бермоқда Тергов департаменти.
Маълум қилинишича, 2018 йилнинг август ойидан 2020 йилнинг октябрь ойигача бўлган вақт оралиғида 44 ёшли О.К. Самарқанд шаҳрида жойлашган уйларнинг бирида К.У., Р.Э., А.А., К.А., М.Ф., Л.М., М.Ш., Г.М., М.Р., Ҳ.С., Д.Р. ва З.Б.га ижарага бошпана беришни ваъда қилиб, паспортларини ғайриқонуний равишда олиб қўйган.
Шунингдек, О.К. уларни тунги вақтда Самарқанд шаҳар Рўдакий кўчаси ва бошқа жойларида фоҳишалик билан шуғулланишга мажбурлаган.
Таъкидланишича, бу шахс 12 нафар фуқарони зўрлик билан ишлатиб, ҳар биридан кунлик 200 000 сўмдан 500 000 сўмгача пул топиш мақсадида фойдаланиб, ушбу йўл билан топилган пулларни ўзида сақлаб, шахсий эҳтиёжлари учун сарфлаган.
Мазкур ҳолат юзасидан Самарқанд шаҳри бўйича ИИО ФМБ ҳузуридаги Тергов бўлинмаси томонидан О.К.га нисбатан Жиноят кодексининг 135-моддаси 2-қисми «б» банди (одам савдоси) билан жиноят иши қўзғатилган. Ўтказилган тинтув тергов ҳаракати давомида юқоридаги шахсларнинг фуқаролик паспортлари тегишли тартибда ҳужжатлаштириб олинган.
Ҳозирда О.К. жиноят иши доирасида Жиноят кодексининг 135-моддаси 2-қисми «б,и» бандлари билан айбланувчи тариқасида жалб қилиниб, унга нисбатан «қамоққа олиш» эҳтиёт чораси қўлланган.
Жиноят иши юзасидан тергов ҳаракатлари давом этмоқда.
Изоҳ (0)