2 ноябрдан 10 ноябргача Ўзбекистондаги туғма юрак нуқсони барча беморлар академик В.Воҳидов номидаги Республика ихтисослаштирилган хирургия илмий-амалий тиббиёт маркази, Консултатив поликлиникасида бепул текширилиб, ташхис олади. Бу ҳақда марказ масъуллари маълум қилди.
Консултатив поликлиника бўлими мудири, тиббиёт фанлари номзоди Саид Ғанихўжаевнинг айтишича, акциядан кўзланган асосий мақсад коронавирус пандемияси туфайли республика ҳудудида ўз вақтидаги тиббий ёрдам олиш учун ҳаракатлана олмаган, хорижга даволанишга чиқа олмаган туғма юрак нуқсони бор беморларга енгиллик яратиш, соғлиғини тиклаш ва соғлом ҳаётга қайтаришга кўмаклашишдан иборат. Тиббиёт ходимлари куни муносабати билан ташкил этилаётган акция кейинчалик вилоятларда ҳам давом эттирилиши кўзланган.
Бу акцияни фақат бизнинг марказимизда эмас, ҳар бир вилоятда масъул гуруҳлар, масъул жарроҳлар сайёр бригадалар шаклида жойларга чиқиб беморларни қабул қилади, операция қилади, ташхис қўяди, максимал даражада яшаш жойида ёрдам беришга ҳаракат қилади. Акциядан сўнг, масалан, биринчи бўлиб Қорақалпоғистонга жарроҳлар, анестезиологлар, реаниматологлар, ультратовуш текширувчи эндоскопистлар каби 10 тадан 15 тагача мутахассисдан иборат сайёр бригада бориб, беморларни қабул қилади, текшириб, ташхис қўйиб, керак бўлса операция ўтказади.Акция доирасида келган беморларга ташхис қўйилади, эхокардиография, электрокардиографик текширув орқали текширилади, тавсиялар берилади, зарурият туғилса, операция қилинади. Операцияга эҳтиёжи борлиги аниқланган беморларга тегишли йўлланма берилиб, кейинчалик бригадаларнинг жойларнинг ўзида операцияга бориши ташкил қилинади.Саид Ғанихўжаев, Консултатив поликлиника бўлими мудири, тиббиёт фанлари номзоди
«Минг афсуски, аҳолининг энг нозик, қийналган қатламларидан бири, жуда оғир беморлар туғма юрак нуқсони борлар саналади. Статистика бўйича турли адабиётларда ҳар мингта туғилган боланинг 4 тадан 8 нафарига туғма юрак нуқсони тўғри келади. Республикамизда ҳар йили ўрта ҳисобда 700 минг чақалоқ туғиладиган бўлса, уларнинг 6 фоизи туғма юрак нуқсони билан туғилади. 2019 йилда туғма юрак нуқсонлари бўлимида мингга яқин энг қийин технологик операция қилинди. Бўлим икки қисмдан иборат: биринчи қисмда 20 та ўринда туғма юрак нуқсони билан дунёга келган чақалоқлар ва 3 ёшгача бўлган гўдакларга ажратилган. Асосий корпусда яна 40 кишилик жой бор»,— дейди Ғанихўжаев.
Бундан ташқари, 2 ноябрдан эътиборан академик В.Воҳидов номидаги РИХИИАТМ икки сменада, яъни соат 08:00 дан 14:00 гача ва 14:00 дан 18:00 гача фаолият олиб бориши маълум қилинди. Айни пайтда марказда олтита юрак жарроҳлиги бўлими мавжуд бўлиб, катта ёшдаги беморларда ревматизмдан кейин келиб чиқадиган юрак клапанларини алмаштириш, инфаркт миокарди бўлган касалларни стентлаш ёки очиқ усулда аорто-коронар шунтлаш амалиётлари ўтказиб келинмоқда.
Изоҳ (0)