Фото: Андижон ва Самарқанддаги боғчаларга етказиб берилган сифатсиз кўмирдан «қўлбола брикет» ясаётган аёллар

Ижтимоий тармоқларда Андижон ва Самарқанд вилоятларида мактабгача таълим бўлимларида сифатсиз кўмирдан аёллар «қўлбола брикет» тайёрлаётган суратлар тарқалди. Маълум бўлишича, иккала вилоят ҳам «Ўзбеккўмир» АЖ филиалларидан жами 6,65 минг тонна кўмир харид қилган.

Davletovuz’нинг Давлат харидлари портали маълумотларига таяниб ёзишича, Андижон вилояти мактабгача таълим бошқармаси «Ўзбеккўмир» АЖнинг «Андижон кўмир етказиб берувчи» филиалидан 7 миллиард 624 миллион сўмга 5 минг 171 тонна кўмир (БР) ҳамда 14 минг 718 тонна кўмир брикет харид қилган.

Самарқанд вилояти мактабгача таълим бошқармаси томонидан эса «Ўзбеккўмир» АЖнинг «Самарқанд кўмир етказиб берувчи» филиалидан 964 миллион сўмга 894 тонна кўмир (БР) ҳамда 1 минг 686 тонна кўмир брикет харид қилинган. Бундан ташқари, «Кўмир таъминот» МЧЖдан 354 миллион сўмга 859 тонна брикет сотиб олинган.

«Барча харидларда кўмир сифатли ва давлат стандартларига жавоб бериши кераклиги белгиланган. Шундай кўмирни сотаётган ‘Ўзбеккўмир’ ўрганилиши керак. Бюджет пулига сифатли маҳсулот олиниши лозим», — дейилади хабарда.

Аввалроқ «Ўзбеккўмир» АЖ бюджет ташкилотларига кўмир етказиб бериш режасини муддатидан олдин бажаргани, 26 октябрь ҳолатига кўра бюджет соҳалари эҳтиёжлари учун 405 минг 400 тонна қаттиқ ёқилғи етказиб берилгани тўғрисида хабар берилганди.