Ёш 40 дан ошгандан кейин, айниқса, наслий мойиллиги бор аёлларда турли касалликлар пайдо бўлишни бошлаши мумкин. Бунинг олдини олиш ва ривожланиб бўлганида кеч бўлмаслиги учун эса шифокор кўригидан ўтиб туриш керак.
Гинеколог кўриги, УТТ текшируви
Ҳеч қандай шикояти бўлмаган ёшларга йилда бир марта, катта ёшли аёлларга эса камида икки марта гинеколог шифокорга мурожаат қилиш керак. Бу билан ривожланиши мумкин бўлган касалликларнинг олдини олиш мумкин бўлади. Статистика маълумотларига кўра, бачадон бўйни саратони 30 ёшдан ошган аёлларда кўпроқ кузатилади. Ривожланган ёки ривожланаётган касаллик ҳақида билиш ва уни даво чораларини қанча эрта бошласа шунча яхши. Одам папиллома вируси — 16 ва 18 серотипи аниқланган аёлларнинг касалликка чалиниш хавфи юқори ва тахминан 70 фоиз ҳолатда айнан уларда бачадон бўйни саратони кузатилади. Аъзоларни УТТ текшириш ва репродуктив система онкомаркерига қон таҳлили топширинг ва шундан кейингина гинеколог қабулига ёзилинг.
Маммолог консультацияси, маммография текшируви
Кўкрак бези саратони аёлларда энг кўп учрайдиган саратон касалликларидан бири ҳисобланади. Аммо, афсуски, аксарият аёллар ушбу касаллик ривожланиб бўлганидан кейингина хабар топади. Ёш ўтиши сайин мазкур саратон пайдо бўлиш хавфи юқори бўлади. Масалан, 65 ёшдан кейин кўкрак бези саратонинг пайдо бўлиш хавфи 30 ёшга қараганда 150 марта кўпаяди. Бу эса шифокорга бориш ва кўрикдан ўтиш зарурлигига жиддий сабаб бўла олади.
Эндокринолог қабулига ёзилиш, глюкоза миқдорини аниқлаш учун қон таҳлили топшириш
Бугунги кунда Ер юзидаги 10 фоиз одам қандли диабетдан азият чекади. Ушбу касалликнинг ўзининг оқибатлари яхши эмаслиги етмагандай, бошқа ҳаёт учун муҳим бўлган тизимларни ҳам зарарлайди. Қандли диабет билан касалланган беморларнинг инфаркт ва инсультга чалиниш хавфи юқори бўлади, қон томирлар мўртлашади ва кўриш қобилияти сусаяди. Наслингизда ушбу касалликка чалинган беморлар бўладиган ва сиз соғлом турмуш тарзига амал қилмайдиган бўлсангиз, унда вақти-вақти билан қондаги қанд миқдорини аниқлаш учун текширувдан ўтиб туриш ва эндокринологга мурожаат қилиш керак. Шифокор сизда чалиниш хавфи бор ёки йўқлиги, бўлса қайси турда эканлигини аниқлашга ёрдам беради.
Кардиолог кўригидан ўтиш ва ЭКГ текшируви
Холестериннинг кўпайиши, зарарли одат ва жисмоний ҳаракатларнинг етишмаслиги организмнинг муҳим жараёнлари сусайишига олиб келади. ЖССТ маълумотларига қараганда, йилига 18 миллион одам юрак касаллиги сабаб ҳаётдан кўз юмади. Аксари юрак қон-томир касалликларининг олдини олиш ёки эрта ташхис қўйилса, муваффақиятли даволаш мумкин. Шу сабабдан ҳам ҳар бир йилда, албатта, ташриф буюриш керак бўлган шифокорлар рўйхатига кардиологни ҳам киритиш керак.
Денситометрия
40 ёшдан бошлаб суяклар мўртлаша бошлайди ва бу тиббиётда остеопороз деб аталади. Бу суяклар жароҳатланиши ва синишига сабаб бўлиши мумкин. Организм анатомияси жиҳатидан мазкур касаллик аёлларда эркакларга нисбатан уч марта кўпроқ кузатилади. Энг ёқимсиз оқибатлардан бири чаноқ-сон суягининг синиш ва чиқиши ҳисобланади. Суяклар мустаҳкамлигининг камайишига бўйнинг баландлиги, озғинлик, шунингдек, климакс ва гормонал контрасептив дори воситаларини қабул қилиш сабаб бўлади. Остеопорозни ёки унга мойилликни денситометрия текшируви орқали аниқласа бўлади. Аммо ҳомиладорлик ва фарзандни она сути билан боқиш даврида денситометрия тавсия қилинмайди.
Изоҳ (0)