Тошкентда қўшнисининг мушугини отган шахс жавобгарликка тортилди, деб хабар беради «Меҳр ва оқибат» ҳайвонларни ҳимоя қилиш жамияти.
Маълумотларга кўра, октябрь ойининг ўрталарида Тошкентнинг Миробод туманида истиқомат қилувчи аёл ўз мушугини қўшниси отиб ташлагани тўғрисида «Меҳр ва оқибат» нодавлат нотижорат ташкилотига мурожаат қилган.
Кейинроқ уй ҳайвонининг эгаси керакли ҳужжатларни тўплаб (иккита ўқ аниқланган рентген сурати, шунингдек, патологоанатомик хулоса), Миробод тумани 4-сонли ИИБга ариза ёзган. Участка нозири эса етарлича далиллар йўқлигига ишора қилиб, ишни судга оширишдан бош тортган ва томонларни яраштириб қўйишга уринган. Бироқ Ҳайвонларни ҳимоя қилиш жамияти ҳуқуқшунослари ишни судгача олиб борган.
Таъкидланишича, суд мазкур ишни кўриб чиққан ва мушукни отган фуқарога нисбатан БҲМнинг 2 баробари миқдорида (446 минг сўм) жарима белгилаган.
Аввалроқ Тошкентда ухлаётган итга қайноқ сув тўккан хавфсизлик ходими ишдан олингани тўғрисида хабар берилганди.
Изоҳ (0)