Андижон вилоятида 144 та давлат мактабгача таълим ташкилоти ўз фаолиятини қайта бошлади, дея хабар берди «Дарё» мухбири Умиджон Мамарасулов.
Вилоят мактабгача таълим бошқармаси ахборот хизматининг аниқлик киритишича, Халқ депутатлари шаҳар ва туман кенгашларининг қарорлари ҳамда ҳудудий санитария эпидемиология осойишталик марказларининг тегишли хулосаларига асосан, 2 та шаҳар ва 10 тумандаги 144 та давлат мактабгача таълим ташкилоти фаолиятига рухсат берилган.
Шунга асосан, МТТлар фаолияти хавфсизлигини таъминлаш мақсадида барча шароитларни яратиш, жумладан, тарбияланувчиларнинг овқатланишини ташкил этиш учун озиқ-овқатлар, ҳимоя воситаларини сотиб олиш, ўрнатиш ва дезинфекция қилиш ишлари, шунингдек, ходимларни меҳнат таътилидан чақириш бўйича ҳужжатлар расмийлаштириш жараёнлари давом этмоқда.
Шу кунгача зарур хавфсизлик чораларини таъминлаб берувчи, санитария-гигиена қоидаларига амал қилган ҳолда ўз фаолиятини бошлаган 144 та мактабгача таълим ташкилоти 10 мингга яқин тарбияланувчиларни ўз бағрига олган.
Қўшимча қилинишича, тайёрлов, катта ва ўрта гуруҳларда тарбияланаётган болалар сони 15 тадан ортишига йўл қўйилмаган.
Изоҳ (0)