Andijonda 144 ta davlat bog‘chasi o‘z faoliyatini qayta boshladi

Andijon viloyatida 144 ta davlat maktabgacha ta’lim tashkiloti o‘z faoliyatini qayta boshladi, deya xabar berdi “Daryo” muxbiri Umidjon Mamarasulov.

Viloyat maktabgacha ta’lim boshqarmasi axborot xizmatining aniqlik kiritishicha, Xalq deputatlari shahar va tuman kengashlarining qarorlari hamda hududiy sanitariya epidemiologiya osoyishtalik markazlarining tegishli xulosalariga asosan, 2 ta shahar va 10 tumandagi 144 ta davlat maktabgacha ta’lim tashkiloti faoliyatiga ruxsat berilgan.

Shunga asosan, MTTlar faoliyati xavfsizligini ta’minlash maqsadida barcha sharoitlarni yaratish, jumladan, tarbiyalanuvchilarning ovqatlanishini tashkil etish uchun oziq-ovqatlar, himoya vositalarini sotib olish, o‘rnatish va dezinfeksiya qilish ishlari, shuningdek, xodimlarni mehnat ta’tilidan chaqirish bo‘yicha hujjatlar rasmiylashtirish jarayonlari davom etmoqda.

Shu kungacha zarur xavfsizlik choralarini ta’minlab beruvchi, sanitariya-gigiyena qoidalariga amal qilgan holda o‘z faoliyatini boshlagan 144 ta maktabgacha ta’lim tashkiloti 10 mingga yaqin tarbiyalanuvchilarni o‘z bag‘riga olgan.

Qo‘shimcha qilinishicha, tayyorlov, katta va o‘rta guruhlarda tarbiyalanayotgan bolalar soni 15 tadan ortishiga yo‘l qo‘yilmagan.