Қашқадарё ҳокимига яна 2 нафар маслаҳатчи тайинланди. Зоир Мирзаевнинг маслаҳатчилари 6 нафарга етди

Қашқадарё вилояти ҳокими Зоир Мирзаевга яна икки нафар маслаҳатчи тайинланди. Бу ҳақда вилоят ҳокимлиги ахборот хизмати хабар берди.

Таъкидланишича, вилоят халқ таълими бошқармаси бошлиғи Фарҳод Очилов вилоят ҳокимининг таълим масалалари бўйича маслаҳатчиси этиб тайинланган. Бошқарма бошлиғига, шунингдек, ўринбосар мақоми берилиб, ишлаши учун вилоят ҳокимлигидан алоҳида хона ажратилган.

Айни кунга қадар Ғузор туман ҳокимлигида инвестициялар ва ташқи савдо бўлими бошлиғи лавозимида ишлаб келган Азамат Авазов эса ҳокимнинг туризм ва спортни ривожлантириш масалалари бўйича маслаҳатчиси лавозимини эгаллаган.

Маълум бўлишича, айни пайтда Зоир Мирзаевнинг маслаҳатчилари сони олти нафарга етган.

Бундан ташқари, вилоят ҳокимлигида бошқа тайинловлар ҳам амалга оширилган.

Вилоят ҳокимлигида ҳуқуқни муҳофаза қилиш органлари фаолияти, ҳарбий сафарбарлик ва фавқулодда вазиятлар масалалари гуруҳи етакчи мутахассиси лавозимида ишлаб келган Лобар Раҳимова ҳокимликнинг ишлар бошқармаси девонхона мудири лавозимини эгаллаган бўлса, вилоят ҳокимлигида ташкилий-назорат гуруҳи етакчи мутахассиси лавозимида ишлаб келган Суҳроб Ашуров ҳокимнинг молия-иқтисодиёт ва камбағалликни қисқартириш масалалари бўйича биринчи ўринбосари котибиятининг тадбиркорлик ва ишбилармонлик муҳитини ривожлантириш, экспортга кўмаклашиш ва қўллаб-қувватлаш гуруҳи раҳбари этиб тайинланган.

Шунингдек, Фазлиддин Ўтаганов ҳокимлик ахборот-таҳлил гуруҳи бош мутахассиси, Фазлиддин Худалов ташкилий-назорат гуруҳи етакчи мутахассиси, Шерзод Ҳасанов ҳокимлик Ахборот хизмати 1-тоифали мутахассиси, Жамшид Аҳатов ҳокимнинг саноатни ривожлантириш, капитал қурилиш, коммуникациялар ва коммунал хўжалик масалалари бўйича ўринбосари котибияти 1-тоифали мутахассиси, Шоҳруҳ Эрбоев вилоят ҳокимлиги ишлар бошқармаси 1-тоифали мутахассиси лавозимларига ўтказилган.