Россиялик блогер ўзининг Mercedes’ини ёқиб юбориб, уни видеога олди

Россиялик блогер Михаил Литвин ўзининг Mercedes GТ63s автомобилини ёқиб юбориб, унинг видеосини YouTube’даги каналига жойлаштирди.

«Mercedes компанияси билан содир бўлган можародан сўнг ‘Акула’мни нима қилишни узоқ ўйладим. Менимча, ушбу ғоя олов! Ва мана, бўлди…», — деб ёзади блогер.

Блогернинг сўзларига кўра, бу автомобиль ишлаб чиқарувчи компания билан содир бўлган можаро сабаб юзага келган.

Роликдан кўриш мумкинки, 20 ёшли йигит кенг дала ўртасига жойлаштирилган машина юкхонаси ичидан бензин солинган идишларни олиб, ёқилғини автомобиль устига сепган. Шундан сўнг блогер четга ўтиб, ўт қўйиб юборган. Литвин Mercedes’ининг ёнаётганини мангалда сосиска пишириб томоша қилиб ўтирган.

Литвиннинг сўзларига кўра, у ушбу машинани 2019 йилнинг майида сотиб олган, бироқ орадан бироз вақт ўтгач Mercedes-Benz GТ63s мунтазам бузила бошлаган. У машинани расмий дилерга олиб борган, бироқ улар носозликни бартараф эта олмаган. Шундан кейин блогер ушбу транспорт воситасидан воз кечишга қарор қилган.

Маълумот учун, Россияда Mercedes-Benz GТ63s машинаси 13 миллион рубль (170 минг доллар) туради.

Эслатиб ўтамиз, 2019 йилда ўзбекистонлик Лазиз Ҳошимов Михаил Литвин томонидан ўйналган Bentley машинасини ютиб олган эди.