Фото: Варшава яқинида чириб бораётган ўнлаб эски автомобиллар

Польшалик фотоблогер Варшава яқинида кўплаб автомобиллар қаровсиз ҳолда сақланаётгани тасвирланган суратлар билан бўлишди, деб хабар беради CARakoom.

«Мен бу ердан неча маротаба ўтганимни ҳисоблай олмайман, бироқ унинг мавжудлиги тўғрисида энди хабар топдим», — дейди «Сергей Бурек» ники остидаги фотоблогер.

Мазкур ҳудуд айнан қаерда жойлашгани тўғрисида деярли маълумот йўқ. Афтидан, автомобиллар дастлаб бу ерга таъмирлаш мақсадида олиб келинган, лекин буни тасдиқлайдиган аниқ факт йўқ. Автомобильларнинг аксарияти Fiat 125p ва 126 моделлари. Атроф чириётган эски автомобиллар қисмларига тўлиб кетган.

Ташландиқ автомобиллар орасида Собиқ Иттифоқ даврида ишлаб чиқарилган техникаларни ҳам учратиш мумкин: эски «Москвич», «Запорожец», «Жигули» ва ҳатто «ЗИЛ-157»ни ҳам. Кузовларнинг бир қисми кесиб олинган, қолган қисмлари ҳам ачинарли аҳволда.

Шунингдек, машиналар орасида мазкур ўлкалар учун ноёб ҳисобланган Ford Escord Mk2, Польшада ишлаб чиқарилган FSO Syrena микроавтомобили, СССРда ўз вақтида машҳур бўлган Nysa 522 микроавтобуси ҳам мавжуд.

Аввалроқ Португалияда 50 га яқин классик Мини моделлари сақланган омбор, Саудия Арабистонида эса совет «Волга»лари «қабристони» топилгани тўғрисида хабар берилганди.