Таниқли турк актёри илк марта ота бўлди, Шеввал Сам «Қора ният»дан кетаётган актёрлар ҳақида гапирди. Турк киноси янгиликлари

Турк киносаноати вакиллари ва сериаллар билан боғлиқ энг сўнгги хабарларни эътиборингизга ҳавола этамиз.

21 октябрь куни Синем Кобал ва Кенан Имирзалиўғлу фарзандли бўлди ва қизига Лалин деб исм қўйди. Шифохонадан чиқаверишда актёр ва унинг рафиқаси кутиб турган мухбирларга жуда ҳам бахтли эканини айтиб, ҳаммага ушбу бахт насиб қилсин, деб тилак билдирган. Синем эса улар янги ҳаёт бошлаётганини маълум қилган.

Аввалига шифохонанинг актёрнинг қизи дунёга келган қавати ёпилгани ҳақида хабар берилганди, лекин Кенаннинг ўзи ушбу маълумот нотўғрилиги, улар мавжуд қоидаларга амал қилганликларини айтган. Шунингдек мухбирларнинг Фаҳрие ва Бурак Ўзчивит сингари фарзандига Instagram саҳифаси очиб бериш ҳақидаги саволга актёр буни унчалик муҳим деб билмаса-да, мухлисларини хафа қилмаслик учун бу ҳақида ўйлаб кўришини маълум қилган.

Шеввал Сам онаси Леман Сам билан бирга Жиҳангир туманида эътибордан четда қолмаган. Ундан «Қора ният» сериалини нима учун актёрлар бирин-кетин тарк этаётгани ҳақидаги саволга Шеввал сснесенарий муаллифлари ва продюсерлар шундай қарорга келгани ва бу ҳақида у ҳам сўнгги дақиқаларда хабар топганини билдирган.

Маълумот учун, Шеввалнинг ўғли Тарик Текин айни вақтда »Садоқатсиз» сериалида суратга тушмоқда. Аввалроқ у онаси билан биргаликда қисқа метражли фильмда ҳам роль ўйнаган.

Нежип Мемили қизи Ася билан бирга тушган сурати билан бўлишган. Унга ота бўлиш меҳнат, севги талаб қилишини ёзиб, лекин орқасидаги ит нега бундай ётганидан ҳайратда эканини яширмаган.

Киванч Татлитуғ Netflix томонидан суратга олинаётган янги «Бир сувости қайиғи ҳикояси» сериалида бош қаҳрамон ролини ўйнайди.

Неслиҳан Атагул турмуш ўртоғи Кадир Дўғулу юзига айланган Ҳатемоғлу кийим брендининг тақдимотида иштирок этди. Тақдимотдан чиқаверишда мухбирларнинг таклиф бўлса Бурак Ўзчивит билан бирга суратга тушиш мазмунидаги саволига Неслиҳан бу савол ноўрин эканлигини айтиб, бу каби саволлар одамни ғазаблантиришини билдирган. Мухбирларнинг фарзандли бўлиш ҳақида ўйлаяпсизми, деган саволига актриса табассум билан: «Мен ўйлаяпман, сиз-чи?», — деб жавоб берган.

«9 карра Лейла» фильмининг тақдимоти пандемия сабаб қолдирилганди. Агар ўзгаришлар бўлиб қолмаса, ушбу фильм премьераси 4 декабрда Netflix’нинг интернет платформасида бўлиб ўтиши режалаштирилган.

«Чуқур» сериалини тарк этган Бариш Ардуч, Солиҳ Бадемжи ва Гўкче Баҳодир билан биргаликда «Клуб» сериалида бош қаҳрамон ролини ўйнайди.

Эфирга узатилиш имконияти берилганига қарамай, «Янги ҳаёт» сериали 9-қисмда якунига етишига тўғри келади.

Шунингдек, яна икки сериал якунига етади. «Ўқитувчи» сериали паст рейтингни қайд қилгани учун 9-қисмда тугатилади. «Томдаги севги» сериали ҳам бош қаҳрамонни ўзгартирганига қарамай, рейтингларда юқори натижа қайд қила олмади ва 16-қисмда сериал якунига етади.

Бундан уч йил аввал, 2017 йил 23 октябрда «Чуқур» сериалининг биринчи қисми эфирга узатилган. Суратга олиш жамоаси ушбу кунни ширинлик билан нишонлади.