1 октябрь ҳолатига кўра, Ўзбекистоннинг доимий аҳолиси йил бошидан буён 477,5 мингга, яъни 1,4 фоизга кўпайиб, 34,38 миллион кишига етди. Бу ҳақда Давлат статистика қўмитасининг мамлакатдаги демографик вазиятга боғлиқ ҳисоботида сўз боради.
Шаҳарлар аҳолисининг улуши 17,4 миллионга (умумий аҳолининг 50,6 фоизи), қишлоқларники эса 16,9 миллион кишига (49,4 фоиз) етган.
Аҳолининг асосий қисми Самарқанд (11,4 фоиз), Фарғона (11,1 фоиз), Қашқадарё (9,7 фоиз) ва Андижон (9,2 фоиз) вилоятлари ҳисобига тўғри келмоқда.
Қўмита маълумотларига кўра, доимий аҳоли умумий сонининг 30,9 фоизи ҳали меҳнатга лаёқатсиз ёшдаги шахслар бўлса, 58,4 фоизи — меҳнатга лаёқатли ёшдагилар ва 10,7 фоизи — меҳнатга лаёқатли ёшдан ўтганлар.
Шу йилнинг январь— сентябрь ойлари давомида 614,7 минг чақалоқ дунёга келгани рўйхатдан ўтказилган бўлиб, туғилиш коэффициенти ҳар 1000 кишига 24 промиллени ташкил этган ва бу ўтган йилнинг мос даврига нисбатан 0,5 промиллега кўп демак.
Шунингдек, ўтган давр мобайнида 184 мингта никоҳ қайд этилган. Энг кўп никоҳ коэффициенти (промилледа) Сирдарё (9,1), Жиззах (8,4), Қашқадарё (7,9) ва Навоий (7,8) вилоятларида рўйхатдан ўтказилган.
Бундан ташқари, январь—сентябрь ойлари давомида 20 мингта ажрашиш ҳолатлари қайд этилган. Энг юқори ажрашиш ҳолатлари Тошкент шаҳрида (1,4), Сирдарё (1,3), Андижон (1), Навоий (0,9) ва Тошкент вилоятларида (0,9) қайд этилган.
Ушбу давр мобайнида мамлакатга келган фуқаролар сони 137,3 минг кишини ташкил қилмоқда, кетганлар — 139,7 минг. Миграция салдоси 2400 кишига камайган.
Эслатиб ўтамиз, 2020 йил 1 июль ҳолатига кўра, Ўзбекистон доимий аҳолиси сони йил бошидан 285 минг 900 кишига кўпайгани маълум қилинган эди. 2020 йил 1 январда бу кўрсаткич 33 миллион 905 минг 800 минг кишини, 1 апрелда эса 34 миллион 36 минг 756 кишини ташкил этган.
Изоҳ (0)