Ўзбекистон бош вазири Абдулла Арипов 12 октябрь куни ахборот муҳити, матбуот котибларининг самарадорлиги, уларнинг ахборот билан ишлаш фаолиятидаги муаммо ва камчиликлар ҳамда бошқа масалалар муҳокама қилинган йиғилиш ўтказгани ва унда Монополияга қарши курашиш қўмитаси раиси Нажмиддинхўжа Шариповни танқид қилиб, қўмитанинг UzAuto Motors компаниясига қарши ҳаракатларини популистик деб атагани хабар қилинганди.
Монополияга қарши курашиш қўмитасининг бош вазир томонидан танқид қилинишига оид хабарлар тарқалгач, интернет фойдаланувчилари, таниқли блогерлар билан бир қаторда ўзларини ҳам популист деб аташди.
Хусусан, блогер Азиза Умарова шундай ёзади: «Кимдир томонидан ихтиро қилинган монополияларни боқишдан чарчаган бу мамлакатнинг кўплаб ақлли фуқаролари популистлар каби кўринади».
«Агар Монополияга қарши кураш қўмитаси ўғри ва муттаҳам монополистларга қарши шунча қилаётган ишлари ортидан популист деб номланса, мен ҳам популистман. Агар ягона сайланган депутат Кушербаев монополист UzAuto Motors’га қарши жараёнларда популист аталса, мен унинг ёнидаман ва бундан фахрланаман» — дея таъкидлайди Отабек Бакиров.
Мавзуга доир: UzAuto Motors навбатдаги суд ишида товарлар нархини шакллантиришда махфий ҳужжатларга асосланганини билдирди
«Бош вазир бошчилигида бўлиб ўтган селектор йиғилиши ва унда кўтарилган масалалар бугун ОАВ ва блогерлар ўртасида кенг муҳокама қилиняпти. Айрим блогерлар томонидан кўтарилган масалалар нотўғри талқин қилиняпти.
Мазкур селектор йиғилиши Ўзбекистон Президентининг «Рақамли Ўзбекистон – 2030 стратегиясини тасдиқлаш ва уни самарали амалга ошириш чора-тадбирлари тўғрисида» 2020 йил 5 октябрдаги ПФ–6079-сон фармони билан белгиланган лойиҳалар ва чора-тадбирларни ўз вақтида ва сифатли амалга оширишни самарали ташкиллаштириш масалаларига бағишланган.
Мажлис Монополияга қарши курашиш қўмитаси фаолиятига бағишланмаган ва унда қўмита раиси Нажмиддинхўжа Шариповнинг ҳисоботи ёки UzAuto Motors компанияси масаласи бўйича махсус ахбороти тингланмаган.
Йиғилишнинг асосий мавзуларидан бири – давлат органлар томонидан олиб борилаётган ахборот сиёсати, матбуот котибларининг фаолияти самарадорлиги, ОАВ билан ишлашда очиқлик ва шаффофликни таъминлаш масалаларига бағишланган.
Йиғилишда бош вазир томонидан ҳозирги кунда юқоридаги йўналишларда давлат органлар томонидан олиб борилаётган ишлар хусусида фикрлар билдирилиб, кўплаб ижобий ва танқидий мисолларга тўхталиб ўтилди. Хусусан, Монополияга қарши курашиш қўмитаси ва UzAuto Motors компанияси ўртасида давом этаётган суд жараёнида шошмасдан қарор қабул қилиш ва имкон даражасида халқаро консултант-мутахассислар билан ҳамкорликда, уларнинг ўрганишлари ҳам инобатга олинган ҳолда иш олиб борилиши таклиф сифатида билдирилди.
Шунингдек, давлат органлари раҳбарлари ОАВ билан ўзаро мулоқотда, асосли ва исботланган далилларга таяниб ҳамкорликни йўлга қўйиш кераклиги, акс ҳолда бу ҳаракатлар популистик кўринишга эга бўлиб қолиши эҳтимоли борлиги назарда тутилган», – дейилади қўмита баёнотида.
Шунингдек, ушбу масала юзасидан депутат Расул Кушербаев ҳам ўз фикрларини билдирди.
«Албатта, ўзгаришлар сари кетаётган Янги Ўзбекистон шароитида жамиятда иллат сифатида кўрилаётган, кўпчилик эътирозига сабаб бўлаётган масалаларни очиқ муҳокама ва танқид қилиш нормал ҳолат ҳисобланади. Буни сўз эркинлиги борасида эришган энг катта ютуғимиз сифатида қабул қилиш керак.
Тўғри, сўнгги пайтларда Монополияга қарши курашиш қўмитаси фаолиятида жонланишлар бор. Бироқ мазкур соҳадаги мавжуд муаммолар олдида бу ҳали етарли эмас. Афсуски, охирги 27 йил давомида монополия масаласи жиловланмагани бугун ‘империя’ даражасидаги ‘оёғи ердан узилган’ айрим монополларнинг пайдо бўлишига олиб келди.
Кечаги мажлисда аниқ нима бўлганини билмайман-у, бироқ ҳукумат раҳбари сифатида бош вазир тегишли соҳа ва тармоқлар бўйича ишларни танқид қилиб, йўл йўриқ бериши ҳукумат табиатига хос табиий жараён. Мен бош вазирни парламент ва депутатларни эшита оладиган камчилик шахслардан бири сифатида биламан, бунга кўп бора шахсан гувоҳ бўлганман.
Ҳукуматнинг автомобилсозлик соҳасида рақобат муҳитини яратиш мақсадида Жиззах, Қўқон, Наманганда янги автомобиль заводлари очишга ҳаракат қилаётганини мавжуд ‘автомобиль монополияси’ни йўқ қилиш борасидаги ижобий қадам сифатида кўраман. Бу эса янги иш ўринлари дегани.
Бугун давом этаётган пандемия шароитида ишлаб турган завод ва корхоналарни сақлаб қолиш, фаолиятини ривожлантириш, янги инвестициялар жалб этиб рақобат муҳитини ривожлантиришимиз керак.
Ўз ўрнида Монополияга қарши курашиш қўмитаси ҳам ўз фаолиятида монополия соҳасига оид амалдаги қонунларимизни ижросини янада қатъий назоратга олиши ва ўз ишини тизимли ташкил этиши лозим, деб биламан.
Билмадим-у, бироқ фикримча бугунги масаланинг кўтарилиши кимнингдир қайсидир ижтимоий муҳимроқ бошқа масаладан эътиборини қочиришига ўхшайди. Ўқувчилар фикрини чигаллаштирмаган ҳам маъқул, бироқ…», — деб сўзини якунлаган Расул Кушербаев.
Эслатиб ўтамиз, 2 октябрдан бошлаб Тошкент шаҳар маъмурий судида UzAuto Motors компаниясининг Монополияга қарши курашиш қўмитаси махсус комиссияси қарорини бекор қилиш бўйича киритган шикояти кўриб чиқилмоқда.
Олдинроқ Монополияга қарши кураш қўмитасининг махсус комиссияси томонидан ўтказилган текширувлар компания автомобиль нархларини 3 миллион сўмдан 19 миллион сўмгача асоссиз оширганини тасдиқлаган, нархларнинг асоссиз оширилган қисмларини бекор қилиб, автомобилларни камайтирилган нархларда сотиш бўйича кўрсатма берган эди. UzAuto Motors эса бунга «автомобиллар нархи асосли ва ҳозир нархни пасайтириш имконсиз» дея жавоб қайтарган эди.
Компания ўшанда Монополияга қарши курашиш қўмитасининг баёнотларини популистик, ҳаракатларини эса масъулиятсизлик деб атаган ва ушбу сценарий энг йирик миллий корхоналардан бирини банкротликка олиб келиши мумкинлигини айтган эди.
Изоҳ (0)