Шавкат Мирзиёев Сардоба сув омбори тўғони ёрилганидан буён ўтган даврда амалга оширилган бунёдкорлик ишлари билан танишиш мақсадида 13 октябрь куни Сирдарё вилоятига боргани хабар берилган эди. Давлат раҳбари сафари давомида Оқолтин тумани «Нурафшон орзу бўстони» фермер хўжалиги даласида бўлиб, пахта ҳосилини кўздан кечирди.
Президент матбуот хизматининг қайд этишича, бу ғўзаларни етиштиришнинг ўзи бўлгани йўқ. Чунки Сардоба сув омбори тошқини қишлоқ хўжалигига ҳам катта зарар етказган, хусусан, Сардоба, Мирзаобод ва Оқолтин туманларидаги 20 минг гектарга яқин экин майдонини сув босганди. Ҳосилни асраб қолиш учун кўчма насослар ёрдамида сув қочирилиб, ер култивация ва чопиқ қилинди. Имконсиз жойларда пайкаллар бузилиб, қайтадан бошқа экинлар экилди.
«Нурафшон орзу бўстони» фермер хўжалиги «Оқолтин АПК» пахта тўқимачилик кластерининг ҳамкоридир. Шу ерда кластерлар раҳбарлари ва фермерлар билан мулоқот бўлди. Пахтани қайта ишлаб, хом ашёни тайёр маҳсулотга айлантириб, қўшимча қиймат яратиш муҳимлиги таъкидланди.
«Кластер ва манфаатдорлик — Ўзбекистон қишлоқ хўжалигининг келажаги. Илм-фан ва инновацияларни жорий этмай туриб, бу соҳани рақобатбардош қилиб бўлмайди», — деган Президент.
Мазкур кластер томонидан 2021—2022 йилларда амалга ошириладиган лойиҳалар ҳақида маълумот берилди. Хусусан, Оқолтин туманида йилига 30 минг тонна чигитни қайта ишлаш бўйича қиймати 4 миллион доллар ҳамда 50 минг тонна донни қайта ишлаш бўйича қиймати 5,8 миллион доллар бўлган лойиҳалар амалга оширилиши режалаштирилган.
Изоҳ (0)