“Bankrotlikka olib kelish”. UzAuto Motors Monopoliyaga qarshi kurashish qo‘mitasi tavsiyalari haqida
UzAuto Motors O‘zbekiston Monopoliyaga qarshi kurashish qo‘mitasi tomonidan avtomobil ishlab chiqaruvchisiga qarshi ishni ko‘rib chiqishda chiqarilgan xulosalarni qat’iyan rad etdi. “Gazeta.uz”ning yozishicha, bu haqda “O‘zavtosanoat" matbuot xizmati bayonotida aytilgan.
9-oktabr kuni UzAuto Motors kompaniyasining Monopoliyaga qarshi kurashish qo‘mitasi (MQKQ) maxsus komissiyasining qarorini bekor qilish to‘g‘risidagi shikoyatini ko‘rib chiqish bo‘yicha navbatdagi sud majlisi bo‘lib o‘tdi. Sud jarayoni videosini bu yerda tomosha qilish mumkin.
UzAuto Motors MQKQning “ushbu holatga taalluqli bo‘lmagan hujjatlar va noto‘g‘ri hisob-kitoblarga asoslangan” qaroriga e’tiroz bildirmoqchi.
Bo‘lib o‘tayotgan jarayonni sharhlar ekan, UzAuto Motors yuridik bo‘limi rahbari Rustam Shaymardonov quyidagilarni ta’kidlagan:
“Tekshiruvga jalb qilingan MQKQ ekspertlarining salohiyatsizligi mijozlar bazamizning bir qismi ko‘ngli sovishiga olib kelganidan afsusdamiz. Ommaviy maydonda e’lon qilingan shoshilinch populistik bayonotlar o‘n minglab odamlar tomonidan davlat kafolati sifatida qabul qilindi, tartibga soluvchining qarori ustidan sudda e’tiroz bildirish mumkinligi borasidagi izoh esa ko‘p holda e’tiborsiz qoldi. Natijada qo‘mitaning mas’uliyatsizlik bilan qilgan xatti-harakati orqali rasmiy shaxslar bayonotiga bo‘lgan ishonchga putur yetdi”.
8-oktabr kuni UzAuto Motors MQKQ da’volarining deyarli har bir punkti bo‘yicha o‘z pozitsiyasini e’lon qildi.
“Mijozlar manfaatlariga sodiq qolish UzAuto Motors’ning ustuvor yo‘nalishi bo‘lib qolmoqda, ammo bu hech kimga uni kimningdir siyosiy ambitsiyalari uchun suiiste’mol qilish huquqini bermaydi. Kompaniya maqsadi — MQKQ tavsiyalariga amal qilgan holda eng yirik milliy korxonalardan birini bankrotlikka olib kelishning halokatli ssenariysi amalga oshirilishining oldini olish. Aslida, qariyb bir trillion so‘mni davlat budjetiga o‘tkazish o‘rniga, uni karantin davrida yangi avtomashinalar sotib olgan bir necha o‘n minglab odamlar orasida taqsimlashga majbur qilishmoqda”, — deyiladi xabarda.
Kompaniyadagilarning fikricha, zavod xalq xo‘jaligining yondosh tarmoqlari, jumladan, ilm-fan, kimyo, metallurgiya va boshqa sohalar uchun lokomotiv vazifasini o‘taydi.
UzAuto Motors mijozlari manfaatlarini respublikaning o‘ttiz to‘rt millionlik aholisi ehtiyojlariga sun’iy ravishda qarama-qarshi qo‘yish qanchalik zarur? Ishlab chiqarishni vayron qilish barobarida davlat budjetini mamlakat ijtimoiy hayoti va sog‘liqni saqlash tizimini rivojlantirish uchun suv va havodek zarur bo‘lgan yillik qariyb besh trillion so‘mlik tushumdan mahrum qilish qanchalik to‘g‘ri?” — deyiladi xabarda.
“Kompaniyamiz, hech bo‘lmasa, tarmoq va sog‘lom mantiqni himoya qilish uchun qo‘ldan kelgan barcha ishni bajarganligimizni anglagan holda, har doimgidek qonun talablariga rioya qiladi”, — deyiladi kompaniya bayonotida.
Eslatib o‘tamiz, deputat Rasul Kusherbayevning tanqidlari ortidan Monopoliyaga qarshi kurashish qo‘mitasi UzAuto Motors AJga nisbatan ish qo‘zg‘atgan edi. Qo‘mita kompaniya tomonidan “Raqobat to‘g‘risida”gi qonunni buzish alomatlarini aniqlagan.
Qo‘mitaning 2020-yil 19-avgust kuni o‘tkazilgan yig‘ilishida maxsus komissiya tomonidan o‘tkazilgan tekshiruvlar kompaniya avtomobil narxlarini asossiz oshirganini tasdiqlagan. Unga ko‘ra, avtomobillar narxi 3 million so‘mdan 19 million so‘mgacha asossiz oshirilgani aniqlangan.
Mazkur o‘rganish natijalari omma uchun e’lon qilingach UzAuto Motors Monopoliyaga qarshi kurashish qo‘mitasi qoshidagi maxsus komissiya qabul qilgan qaror ustidan sudga shikoyat qilishini bildirgandi va keyinroq kompaniya Toshkent shahar ma’muriy sudiga shikoyat qilgani ma’lum bo‘lgandi.
Mavzuga doir: UzAuto Motors navbatdagi sud ishida tovarlar narxini shakllantirishda maxfiy hujjatlarga asoslanganini bildirdi
