Олмалиқ шаҳар ҳокими ўғли билан боғлиқ можаролар ортидан ишдан олинди

Тошкент вилоятининг Олмалиқ шаҳри ҳокими Усмон Раҳимов ўғли билан боғлиқ можароли хабарлар ортидан ишдан кетди. Бу ҳақда вилоят ҳокимлиги ахборот хизмати хабар қилди.

Қайд этилишича, Халқ депутатлари Олмалиқ шаҳар Кенгашининг навбатдан ташқари сессияси бўлиб ўтди. Унда ташкилий масала кўрилди.

Сессияда кун тартибидаги масала бўйича Тошкент вилояти ҳокими Рустам Холматов маъруза қилган. Вилоят ҳокими ўз сўзида Олмалиқ шаҳрини ижтимоий-иқтисодий ривожлантиришда йўл қўйилган хато-камчиликларга тўхталган, шунингдек, раҳбар одам ўз шахсий ҳаётига ҳам эътиборли бўлиши, оиласига вақт ажратиши, фарзандлар тарбияси билан жиддий шуғулланиши лозимлиги хусусида сўз юритган.

«Бугунги кунда муҳтарам юртбошимизнинг ташаббуси билан мамлакатимизда очиқлик сиёсати жорий этилган. Ҳаммамиз жамоатчиликнинг қатъий назоратидамиз. Шунингдек, ишлайман деган одамга барча шароит яратиб берилган. Машина, яхшигина ойлик маош берилади.

Хабарингиз бор, яқинда Олмалиқ шаҳри ҳокими билан боғлиқ ҳолат интернетда тарқалди. Замон тезкор. Ҳар қандай воқелик тез тарқаляпти. Агар у ёмон, нохуш бўлса, эшитиб, ич-ичингдан эзиласан киши...

Яхши биласизларки, юртимизда камбағалликка қарши кураш бошланди. Юртбошимиз БМТ бош минбаридан туриб, камбағалликка қарши кураш ташаббусини илгари сурдилар. Шундай пайтда бу воқеа бўлиб турса, раҳбарнинг оиласида шундай муҳит бўлса, мутлақо тушунарсиз ҳолатдир.

Шаҳар ҳокими қандай инсон бўлиши керак? Раҳбарга кўп нарса боғлиқлигини ҳаёт ҳақиқати тасдиқлайди. Ҳоким — шу ҳудуднинг отаси.

Мен Усмон Раҳимовнинг ҳокимлик фаолияти мутлақо қониқарсиз, у ишламади, демоқчи эмасман. Бу ўринда гап раҳбарнинг ҳар жиҳатдан эл-юртга ўрнак бўла олиши ҳақида кетяпти. Бинобарин, муҳтарам юртбошимиз, донишманд халқимиз раҳбарнинг, унинг оиласининг камтарлик фазилатига қараб баҳо беради», – деган вилоят ҳокими.

Қобил Ҳамдамов мазкур лавозимга тайинлангунга қадар Тошкент вилояти ҳокимининг шаҳарлар инфратузилмасини ривожлантириш, ободонлаштириш ва коммунал хўжалик масалалари бўйича ўринбосари сифатида ишлаб келган.

Усмон Раҳимов 2019 йил август ойидан буён Олмалиқ шаҳри ҳокими лавозимида ишлаб келаётганди.

Эслатиб ўтамиз, Усмон Раҳимов ўғли Дилшод Исмоиловнинг Тошкент кўчаларида соатига 150 километр тезликда машина ҳайдагани видеоси тарқалди ва ҳолат юзасидан собиқ ҳоким изоҳ берди. Сўнгра ҳокимнинг ўғли бу қоидабузарлиги учун жарима тўлади.

Шу билан бирга, Дилшод Исмоиловнинг ўртоқлари билан 56 ёшли эркак ва унинг ўғлини калтаклагани маълум бўлди. Бош Прокуратура ушбу ҳолат юзасидан аввал тўхтатилган тергов ҳаракати тикланганини хабар қилди.