АҚШ президенти Дональд Трамп ортиқ коронавирус инфекцияси ташувчиси эмас. Бу ҳақда The New York Times нашри президентнинг даволовчи шифокори Шон Конлининг сўзларига асосланиб хабар тарқатди.
Фото: Vox
Конлининг сўзларига кўра, Трампнинг ҳолати АҚШ касалликлар назорати марказининг амалдаги стандартларига мувофиқ уни карантиндан чиқаришга имкон беради.
Бироқ газета Трампнинг COVID-19’га топширган тестининг манфий натижа кўрсатгани юзасидан Конлининг аниқ изоҳ бермаганини қайд этган.
АҚШ президенти 10 октябрдан сайловолди кампаниясига қайта киришган.
«Ўзимни жуда яхши ҳис этяпман», — деган Трамп Оқ уй айвонидан туриб Жанубий майсазорда тўпланган сайловчиларга қилган мурожаатида.
Бу Трамп COVID-19 билан касаллангани эълон қилинганидан кейинги биринчи оммавий чиқиши бўлди.
«Биз сайловолди оммавий тадбирларига киришяпмиз, шу сабабли ҳам мамлакатимизнинг социалистик давлатга айланишига йўл қўймаслигимиз зарур», — дея таъкидлаган Трамп ўз нутқида.
Дональд Трампда COVID-19 коронавирус инфекцияси борлиги аниқланганидан кейин у уч кун (3 – 5 октябрь кунлари) давомида Уолтер Рид ҳарбий госпиталида даволанди. Шифокорлар Трампни Regeneron Pharmaceuticals компаниясининг препарати (REGN-COV2 антитаначалар коктейли), шунингдек, Bloomberg нашрининг ёзишича, «синк, Д витамини, Фамотидин, мелатонин ва аспирин билан даволашган.
Трампнинг ўзи ҳам касалликнинг эрта босқичида шифокорларга мурожаат қилгани ҳамда Regeneron компаниясининг препарати воситасида тузалганини айтган.
«Менимча, шифохонага дастлабки аломатлар кузатилганида, яъни ўз вақтида мурожаат қилиш жуда муҳим», — дея таъкидлаган АҚШ етакчиси Fox’га берган интервьюсида.
Июль ойида Трамп июнда Оклахомада ўтган митингдан кейин коронавирусга чалинганлар сони кескин ошиб кетгани туфайли сайловолди учрашувларни ўтказмаслик тарафдори эканини билдирган. Трамп ўз тарафдорлари билан телефон орқали онлайн учрашишни исташини таъкидлаган.
