Тожикистонда президент сайловларида овоз бериш учун сайлов участкалари очилди, деб хабар беради «РБК». Овоз бериш 06:00 дан 20:00 гача (Тошкент вақти билан бир хил) бўлиб ўтади.
Мамлакат бўйлаб 3414 та сайлов участкаси очилган бўлса, Тожикистондан ташқарида яна 39 та участка ишлайди. Мамлакат Марказий сайлов комиссияси маълумотларига кўра, жами 4,9 миллион сайловчи рўйхатга олинган.
Президент лавозими учун беш номзод курашмоқда, улар орасида амалдаги президент Эмомали Раҳмон ҳам бор. Сайловчилар рўйхатига киритилганларнинг 50 фоиздан ортиғи қатнашган тақдирда, сайловлар бўлиб ўтган деб ҳисобланади. Овозларнинг ярмидан кўпини қўлга киритган номзод ғолиб бўлади.
Сайловларни халқаро кузатувчилар кузатиб боради. Бунда гап ЕХҲТ, МДҲ Парламентлараро ассамблеяси, МДҲ Ижроқўми, ШҲТ, шунингдек, Россия ва Ўзбекистондан борган 122 нафар халқаро кузатувчилар ҳақида бормоқда.
Эслатиб ўтамиз, Шавкат Мирзиёев 5 октябрь куни Тожикистон президенти Эмомали Раҳмон билан телефон орқали мулоқот қилиб, бўлажак президентлик сайловларида муваффақият тилаган эди.
Изоҳ (0)