Сўнгги бир кеча-кундузда дунё бўйлаб 338 799 киши коронавирус юқтириб олди, бу бутун пандемия давридаги янги рекорд бўлди. Бу ҳақда «РБК» Жаҳон соғлиқни сақлаш ташкилоти сайтига таяниб хабар бермоқда.
Фото: Getty Images
Янги ҳолатларнинг энг кўп сони Америка қитъасида қайд этилган — у ерда бир суткада 122 715 киши касалликни юқтирган. Ундан кейинда Европа (96,9 мингта янги ҳолат), учинчи ўринда — Жануби-шарқий Осиё (89,6 мингта янги ҳолат) бормоқда.
Бундан аввалги рекорд ЖССТ томонидан 4 октябрь куни қайд этилган, ўшанда коронавирусга чалиниш билан боғлиқ янги ҳолатлар бир кунда 330 мингтага кўпайган эди.
Ташкилот статистикасига кўра, дунёда коронавирусни юқтириб олганларнинг жами сони 36,002 миллионтани ташкил этади. Жонс Ҳопкинс университети маълумотлари бўйича эса, уларнинг сони 36 337 110 нафарга тенг.
Эслатиб ўтамиз, Ўзбекистонда COVID-19 инфекциясини юқтириб олганлар сони расман 60 минг кишидан ошди. Соғлиқни сақлаш вазирлигининг 8 октябрь соат 18:00 ҳолатига доир маълумотларига кўра, мамлакатда жами 60026 ҳолатда коронавирус инфекцияси аниқланган.
Маълумот учун, дунёда коронавирусга чалинганлар сони 30 августда 25 миллион, 11 сентябрда 28 миллион, 14 сентябрда 29 миллион, 18 сентябрда 30 миллион, 21 сентябрь куни 31 миллион, 5 октябрь куни 35 миллион, 8 октябрь куни 36 миллион кишидан ошган эди.
