Қашқадарёдаги мавжуд 1157 та мактабдан 75 тасининг битирувчилари ОТМга киролмаган. Бу ҳақда вилоят ҳокими Зоир Мирзаев раҳбарлигида пандемия шароитида умумтаълим мактабларида ўқув жараёнини ташкил этиш ва юзага келаётган муаммоларни бартараф этиш масалаларига бағишланган йиғилишда маълум қилинди, дея хабар берди «Дарё» мухбири.

Фото: «Дарё»

Маълум қилинишича, вилоят раҳбари Зоир Мирзаев халқ таълими тизимидаги муаммоларни танқид қилиб, битирувчилари ўқишга киролмаган мактабларнинг ўнтасини санаб ўтган.

Вилоят халқ таълими бошқармаси ахборот хизмати раҳбари Файзулла Эшқуловнинг аниқлик киритишича, Чироқчида 20 та, Косон туманида 5 та, Деҳқонободда 16 та, Муборакда 4 та, Нишонда 3 та, Ғузорда 5 та, Шаҳрисабз шаҳрида 1 та, Шаҳрисабз туманида эса 5 та, Қамашида 3 та, Миришкорда 2 та, Яккабоғ ва Қарши тумани 5 тадан, Китобда эса 4 та мактаб битирувчилари ОТМга киролмаган.

«Битирувчилари ўқишга киролмаган 75 та мактабга туман, шаҳар халқ таълими бўлими мудирлари ва ўринбосарларини мактаб директори қилиб тайинласак нима дейсизлар? Мудир ва ўринбосарлари зўр бўлса, ўша мактабни қолоқликдан олиб чиқсин. Масъул ҳам лавозимини бажаради, ҳам мактабга раҳбарлик қилади. Қайси туман ёки шаҳар халқ таълими бўлими мудири шундай ташаббус билан чиқади?», — дея масъулларга юзланган вилоят ҳокими.

Фото: «Дарё»

Ҳоким Зоир Мирзаев халқ таълими бошқармаси бошлиғи ўринбосарларига шундай ташаббус билан чиққан мудир ва уларнинг ўринбосарлари рўйхатини шакллантириб, бу ҳақда ОАВда маълумот берилиши кераклигини таъкидлаган.

«Муҳтарам Президентимиз жойлардаги халқ таълими масъуллари вилоят ҳокимининг таълим тизими бўйича ўринбосари деган талабни қўйди. Демакки, бугундан бошлаб мен вилоят халқ таълими бошқармаси бошлиғи вазифасини ҳам бажараман. Таълим тизимидаги муаммолар ва жараёнлар билан энди шахсан ўзим шуғулланаман», — деди Зоир Мирзаев.

Фото: «Дарё»

Зоир Мирзаевнинг қўшимча қилишича, бундан кейин вилоят халқ таълими бошқармаси бошлиғи ўринбосарлигига, шунингдек туман ва шаҳар ХТБ мудирлигига номзодлар танлаб олинади ва улар вилоят раҳбари суҳбатидан ўтади.

«Ишлайман, янгилик қиламан, деган ташаббускорларни раҳбарликка ўтказамиз. Бу ҳақдаги эълонлар вилоят ҳокимлиги ва туман, шаҳар ҳокимликларининг расмий сайтлари ва Telegram каналларида эълон қилинади. Ишлаш иштиёқи бўлган ташаббускорларни кутиб қоламиз», — деган Зоир Мирзаев.