Ўзбекистондаги коллеж ва техникумларда ўқиш истагини билдирган абитуриентлардан ҳужжатларни қабул қилиш муддати узайтирилди. Бу ҳақда Олий ва ўрта-махсус таълим вазирлиги хабар берди.
Вазирлик томонидан маълум қилинишича, кўп сонли ота-оналар, ёшлар, хусусан жорий йилда ОТМларга ўқишга кириш учун етарли балл тўплай олмаган абитуриентларнинг коллеж ва техникумларда таълим олиш имкониятини яратиш мақсадида абитуриентлар ҳужжатларини онлайн қабул қилиш муддати 2020 йил 20 октябрга (20 октябрь куни ҳам) қадар узайтирилди.
Абитуриентларнинг ҳужжатларини қабул қилиш онлайн тарзда коллежларга www.kollej.edu.uz ва техникумларга www.texnikum.edu.uz электрон платформалари орқали амалга оширилади.
Коллеж ва техникумларга электрон платформа орқали қуйидаги ҳужжатлар қабул қилинади:
- Электрон ариза;
- Паспорт (электрон) нусхаси;
- Умумтаълим мактабининг 11-синфни тугатганлигини тасдиқловчи аттестат (электрон) нусхаси ёки ўрта-махсус, касб-ҳунар таълим муассасасини тамомлаганлиги тўғрисидаги диплом (электрон) нусхаси;
- 3х4 фотосурат.
Эслатиб ўтамиз, техникумларга ҳужжатларни қабул қилиш бошлангани ҳақида Олий ва ўрта-махсус таълим вазирлиги август ойининг охирида маълум қилганди. Ўзбекистондаги коллежларга қабул квоталари эса сентябрь ойининг бошида тасдиқланганди.
Изоҳ (0)