Ўзбекистон Республикаси таълим муассасаларига ўқишга қабул қилиш бўйича давлат комиссиясининг 2020 йилдаги 5-сон баёни билан олий таълим муассасаларининг бакалавриат таълим йўналишлари бўйича табақалаштирилган тўлов-контрактнинг минимал миқдорлари тасдиқланди. Бу ҳақда Олий ва ўрта-махсус таълим вазирлиги маълум қилди.
Мазкур миқдорлар 2020 йилдаги кириш имтиҳонлари натижаларига кўра, тўплаган баллари тасдиқланган қабул параметрлари чегарасига 4 балдан ортиқ етмаган ва давлат комиссияси томонидан белгиланадиган минимал балл — 56,7 баллдан кам бўлмаган ҳолда қўшимча равишда ўқиш истагини билдирган абитуриентларга биринчи ўқув йили учун қўлланилади.
Маълум қилинишича, бакалавриат таълим йўналишларининг кундузги таълим шакли бўйича табақалаштирилган тўлов-контракт миқдорлари ушбу таълим шакли учун белгиланган стипендиясиз базавий тўлов-контракт миқдорларига 10 фоизли чегирма қўлланган ҳолда ҳисобланади.
Вазирлик томонидан тақдим этилган жадвалга кўра, таълим йўналишига боғлиқ равишда табақалаштирилган тўлов-контракт миқдорлари таълим шакли учун белгиланган стипендиясиз базавий тўлов-контракт миқдорларининг 8 бараваридан 17 бараваригача бўлиши мумкин.
Эслатиб ўтамиз, абитуриентлар табақалаштирилган тўлов-контракт асосида ўқиш учун 2020 йил 26 сентябрдан бошлаб олий таълим муассасаларига мурожаат этишлари мумкинлиги маълум қилинганди.
Мавзуга доир:
- Ўзбекистон ОТМларида бакалавриатнинг 1-курс талабалари янги ўқув йилини 12 октябрдан бошлайди
- «Ҳарбий тавсияномалари бўлган мурожаатчилар рўйхати қайта кўриб чиқилади» – ДТМ
- Ўзбекистон ОТМларига кириш имтиҳонларида 189 балл тўплаб, контрактга кирган абитуриентларнинг натижалари қайта ҳисобланди. Улар бюджетга кирди
Изоҳ (0)