Тошкент метрополитенининг «Сергели» йўналишини қуриш ишлари якунланаётгани маълум қилинди

Тошкент метрополитенининг «Сергели» йўналишини қуриш ишлари якунланмоқда. Бу ҳақда Ўзбекистон Транспорт вазирлиги ахборот хизмати хабар берди.

Маълум қилинишича, Сергели—Олмазор метро йўналишида релсларни ўрнатиш ишлари тугатилиб, бекатларда сўнгги пардозлаш ишлари олиб борилмоқда.

Умумий қиймати 82,66 миллион доллар бўлган ушбу лойиҳада дастлабки қурилиш ишлари 2017 йил бошида бошланган эди. Мазкур лойиҳа «Боштранслойиҳа» акциядорлик жамияти мутахассислари томонидан тайёрланган бўлиб, бунёдкорлик ишлари «Ўзбекистон темир йўллари» акциядорлик жамиятининг «Кўприкқурилиш трести» унитар корхонаси мутахассислари томонидан бажарилмоқда.

Вазирлик томонидан маълум қилинишича, лойиҳа «Чоштепа», «Тошкент ҳалқа йўли», «Сергели», «Афросиёб» ва «Қипчоқ» бекатларидан иборат. Бугунги кунда ушбу объект қурилиш ишларида 1200 га яқин мутахассис ва ишчи-ходим, 100 дан ортиқ машина ва техникалардан фойдаланилмоқда.

Қурувчилар томонидан ҳозиргача «Чоштепа», «Тошкент ҳалқа йўли», «Сергели», «Афросиёб» ва «Қипчоқ» бекатларида асосий қурилиш ишлари якунланиб, ташқи ва ички қисмларга безак бериш ишлари амалга оширилмоқда. Шу кунгача бекатлар оралиғидаги икки йўлли пўлат изларнинг жами 12,8 километр қисмига темир йўл излари тўлиқ ётқизилди. «Чоштепа» бекати Чилонзор йўналишидаги «Олмазор» ерости бекати билан боғланади.

Ушбу йўналишнинг туннел қисми Тошкент метрополитенининг Чилонзор йўналишидаги «Олмазор» ерости бекатига уланди. «Чоштепа» бекати янги йўналишнинг дастлабки эстакада шаклидаги бекати бўлади. Ундан кейин эса «Тошкент ҳалқа йўли» бекати келади. Ушбу йўналиш «Сергели», «Афросиёб» ва «Қипчоқ» бекатлари билан якун топади. Бу бекатларда ҳам асосий қурилиш ишлари тугатилиб, перронларни пардозлаш, эскалатор ўрнатиш, метро поездлари учун электр энергиясини монтаж қилиш, электр ёритиш учун коммуникация кабелларини улаш ишлари олиб борилмоқда.

Таъкидланишича, ўтган вақт давомида лойиҳа-смета ҳужжатларида кўрсатилган 1484 дона темир-бетон балканинг барчаси 100 фоизга ўрнатилди. Шунингдек, 222 дона таянч устун ригели, 223 дона таянч устуннинг ўрнатилиши якунига етди.

Маълум қилинишича, бекатларнинг кириш, чиқиш ҳудудлари кўриниши жиҳатидан бир-бирини такрорламайди, яъни ўзига хос ранг-баранг меъморчилик асосида барпо этилмоқда. Перрон қисмига ишлатилган қурилиш маҳсулотлари кўриниши, ранги ва тури бўйича бир-биридан фарқ қилади. Йўловчилар учун ҳам катта қулайликлар яратилиши кўзда тутилган. Хусусан, имконияти чекланганлар учун бекатлар платформасида хавфсиз тактил плиткалар ётқизилиши ҳамда йўловчиларнинг платформаларга кўтарилиши учун лифт ва эскалатор, хавфсизликни таъминлаш мақсадида эса бекатларга видеокузатув ускуналари, IT русумдаги турникетлар ҳамда электр тежайдиган ёритиш чироқлари ўрнатилади. Мобил алоқа ускуналари учун электр қувватлагичлар бўлади.

Вазирликнинг хабар беришича, «Сергели» метро йўналишида қурилиш ишлари тўлиқ тугатилгач «Ўзбекистон темир йўллари» акциядорлик жамияти ва Россиянинг «Метровагонмаш» акциядорлик жамияти ўртасидаги келишувга кўра, Тошкент шаҳридаги ерусти метрополитени учун ҳар бири 4 та вагондан иборат метро поездлари мазкур янги йўналишда ҳаракатланади. Ушбу лойиҳа якунига етгач 214 та янги иш ўрни яратилади.

Қайд этилишича, охирги 3 йилда туманда 19 522 хонадонли 460 та кўп қаватли уй фойдаланишга топширилди. Намунавий кўринишдаги 26 та маҳалла гузари барпо этилди. Шу даврда 100 мингдан зиёд аҳоли кўчиб келиб, туманнинг жами аҳолиси сони 276 минг нафардан ошди.

Эслатиб ўтамиз, Тошкент метросининг Юнусобод йўналишидаги янги қуриб битказилган бекатлар ҳамда ерусти ҳалқа метросининг биринчи босқичи сентябрь ойининг бошида ишга тушганди.