Андижон шаҳрида Damas ҳамда Spark автомашиналари иштирокида йўл-транспорт ҳодисаси содир бўлди. Оқибатда Damas автомашинасининг ҳайдовчиси – ИИБ ходими калтакланиб, тан жароҳати етказилди. Ҳолат юзасидан Андижон вилояти прокуратураси томонидан терговга қадар текширув ҳаракатлари олиб борилди. Бу ҳақда Бош прокуратура хабар қилди.
Мазкур ҳолат юзасидан Андижон шаҳар прокуратураси томонидан фуқаролар Х.Б. ва Х.Э.га нисбатан Жиноят кодексининг 105-моддаси 2-қисми «и» банди (бир гуруҳ шахслар томонидан қасддан баданга ўртача оғир шикаст етказиш) билан жиноят иши қўзғатилган.
Иш ҳужжатларига кўра, 2020 йилнинг 24 сентябрь куни Андижон шаҳар ИИО ФМБ 1-сонли ИИБ тергов бўлинмаси терговчиси С.Ғ. ўзининг бошқарувида бўлган Damas русумли автомашинанинг бошқарувини йўқотиб, йўл четидаги Spark русумли автомашина билан тўқнашиб, йўл транспорт ҳодисасини содир этган.
Шундан сўнг, Spark русумли автомашина ҳайдовчиси Х.Б. ҳамда унинг ёнида бўлган Х.Э. ходим С.Ғ. билан жанжаллашиб, унга тан жароҳати етказган.
Мазкур ҳолат юзасидан воқеа иштирокчиларига етказилган тан жароҳатлари, хусусиятлари ва оғирлик даражасини аниқлаш юзасидан суд-тиббий экспертизаси тайинланган.
Жиноят иши бўйича Х.Б. ва Х.Э. сиртдан айбланувчи тариқасида жалб қилиниб, уларга нисбатан қамоққа олиш тарзидаги эҳтиёт чораси қўлланилиб, қидирув эълон қилинган.
Ҳозирда дастлабки тергов ҳаракатлари давом этмоқда.
Мавзуга доир:
Изоҳ (0)