Қорақалпоғистон Жўқорғи Кенгесининг 2 октябрь куни Президент Шавкат Мирзиёев иштирокида бўлиб ўтган навбатдан ташқари сессиясида республиканинг янги раҳбари номи маълум бўлди — 20 сентябрь куни бўлиб ўтган сайловлар натижасига кўра Жўқорғи Кенгес аъзосига айланган, бунгача Президент ҳузуридаги Оролбўйи халқаро инновация маркази директори сифатида фаолият олиб боргани айтилаётган экофаол Мурат Камалов энди (агар орада бирор бошқа фавқулодда ҳолат юз бермаса) камида 2024 йилга қадар Қорақалпоғистонга раҳбарлик қилади.
Жўқорғи Кенгеснинг аввалги раиси Муса Ерниязов 2020 йил 31 июль куни коронавирус инфекцияси асоратлари оқибатида вафот этган эди (унда касаллик 24 июнь куни тасдиқланган, шунга қарамай унинг коронавирусга чалингани 18 июлга қадар жамоатчиликдан яширилган эди). Ерниязовгача кенгашга Тимур Камолов (1997—2002 йилларда) ва Уббинияз Аширбеков (1992—1997 йилларда) раислик қилган. Қорақалпоғистон Конституциясининг 80-моддасига мувофиқ, Жўқорғи Кенгеснинг раиси Қорақалпоғистон раҳбари ва энг юқори лавозимли шахсидир.
Изоҳ (0)