«У отасининг ишларини давом эттириб, халқни рози қилади, деб ишонаман» — Шавкат Мирзиёев Қорақалпоғистоннинг янги раҳбари ҳақида

Коронавирус бутун дунёда бўлгани каби Ўзбекистонга ҳам йўқотишлар олиб келди, лекин ҳаёт давом этади, шу шароитга муносиб бўлиб, тўғри йўл топиш зарур. Бу ҳақда Президент Шавкат Мирзиёев Қорақалпоғистон Жўқорғи Кенгесининг 2 октябрь куни очилган навбатдан ташқари сессиясидаги чиқишида айтиб ўтди.

Президентнинг таъкидлашича, ҳозирги мураккаб пайтда раҳбар бўлиш осон эмас, шунга қарамай Қорақалпоғистонни ривожлантириш бўйича бошланган ишлар икки-уч карра кўпайтириб давом эттирилади. Президент айни йиғилишда Қорақалпоғистоннинг янги раҳбари этиб сайланган Мурат Камаловга баҳо бераркан, у отаси Қаллибек Камалов ишларини давом эттириб, халқни рози қилишига ишонч билдирди.

Мурат Камаловни кўп йиллардан бери танийман. У аввало ҳалол одам, ватанпарвар одам. Қаерда ишлаган бўлмасин, қорақалпоқ элининг дарди билан яшаганига гувоҳман. Энг асосийси шу. Бошқаси тажриба билан келади.

У отаси Қаллибек Камалов, марҳум Муса Ерниязов ишларини давом эттириб, халқни рози қилади, деб ишонаман.

Шавкат Мирзиёев, Ўзбекистон Президенти

Эслатиб ўтамиз, 65 ёшли Мурат Камалов 2020 йил 20 сентябрь куни бўлиб ўтган навбатдан ташқари сайловлар вақтида Жўқорғи Кенгес депутати этиб сайланган эди. Сайловлар арафасида эълон қилинган номзодлар рўйхатидаги маълумотларга кўра, Экопартия аъзоси ҳисобланган Камалов сайловгача Президент ҳузуридаги Оролбўйи халқаро инновация маркази директори лавозимида ишлаб келган.

Маълумот учун, Қорақалпоғистоннинг Мурат Камаловдан аввалги раҳбари ҳисобланган Муса Ерниязов 2020 йил 31 июль куни коронавирус инфекцияси асоратлари оқибатида вафот этган эди. Мурат Камаловнинг отаси Қаллибек Камалов эса 1963—1984 йилларда Қорақалпоғистонга раҳбарлик қилган. 94 ёшли Қаллибек Камалов 2017 йилда Президент Шавкат Мирзиёевнинг фармони билан «Эл-юрт ҳурмати» ордени билан мукофотланган.