Сурхондарё вилоятининг Қумқўрғон туманида 6,5 миллиард сўмга қурилган кўприк 1 йилу 7 ой хизмат кўрсатгач яроқсиз ҳолга келганди. Вилоят прокуратурасининг маълум қилишича, ушбу иш бўйича 2020 йил 29 сентябрь куни терговга қадар текширув ҳаракатлари бошлаб юборилган.
«Термиз транспорт прокуратурасининг 2020 йил 18 июнь куни Ўзбекистон Республикаси Жиноят процессуал кодексининг 83-моддаси 2-бандига асосан жиноят иши қўзғатишни рад этиш ҳақида қарори бекор қилиниб, 2020 йил 29 сентябрь куни терговга қадар текширув ҳаракатлари бошлаб юборилди», — дейилади Сурхондарё вилояти прокуратурасининг «Дарё»даги мақолага муносабатида.
Вилоят прокуратурасининг изоҳ беришича, пудратчи ва буюртмачи ўртасида имзоланган 2014 йил 21 апрелдаги шартномада кўприк қурилишини зиммасига олган пудратчининг мажбуриятлари кўрсатиб ўтилган бўлса-да, пудратчи мажбуриятларини тўлиқ бажармаган. Бу вилоят прокуратурасига маълум бўлган. Бироқ, коронавирус пандемияси сабаб прокуратура тергов-суриштирув жараёнларини олиб боролмаган.
«Қумқўрғон тумани ҳудудидан ўтувчи, давлат аҳамиятидаги 4р-105 ‘Дарбанд-Бойсун-Элбаён’ автомобиль йўлининг 76-километрида жойлашган, узунлиги 66 погонаметр бўлган ‘Полвонтош’ селгаси устидаги кўприкнинг оралиқ таянч устунлари 1 метрга чўкиши ва устки плиталари қулаши натижасида кўприк яроқсиз ҳолатга келиб, ҳозирги кунда пиёдалар ва автомашиналар ҳаракати чекланган. Мазкур ҳолат юзасидан ‘Сурхон қурилиш назорат ўлчов’ МЧЖ ва вилоят автомобиль йўллари ҳудудий бош бошқармаси мутахассислари томонидан расмийлаштирилган далолатномага кўра ўтказилган назорат ўлчовида пудратчи корхона томонидан ҳақиқатда бажарилган ишлар ‘Бажарилган ишларни тасдиқловчи счёт-фактура маълумотномаси’ га қўшиб ёзиш ҳолатлари аниқланмаган», — дейилади прокуратура муносабатида.
Сурхондарё вилоят прокуратурасининг қўшимча қилишича, лойиҳа смета ҳужжатларига нисбатан бажарилмаган ишлар ҳажми 34 миллион 491 минг 265 сўмни ташкил қилади.
Мазкур муаммони ўрганган «Дарё» мухбири билан суҳбатлашган қумқўрғонликлар «Мана шу кўприк 1 йил 7 ой деганда шундай ‘авария’ ҳолатига келиб қолди. Ҳолбуки, бу кўприкка 6,5 миллиард сўм сарфланганди. Иш сифатсиз бажарилгани учун кўприкнинг ‘умри қисқа’ бўлди. Биз йўлимиз ҳам шундай сифатсиз таъмирланиб, ҳеч қанча вақт ўтмасдан яроқсиз ҳолга келишидан қўрқяпмиз», — деганди.
«Кўганли» маҳалласида яшовчи аҳолининг «Дарё»га билдиришича, мазкур мақола эълон қилингач, вазият туман ҳокимлиги масъуллари ва йўл қурилишига жавобгар шахслар томонидан ўрганилган ва камчиликларни бартараф этишга киришилган.
Изоҳ (0)