Қишлоқ хўжалиги вазирлиги: Озиқ-овқат саноат маҳсулотларини ишлаб чиқариш ҳажми 2020 йилнинг 6 ойида 21,5 триллион сўмга етди

Ўтган 2019 йилда ялпи озиқ-овқат саноат маҳсулотларини ишлаб чиқариш ҳажми 35,3 триллион сўмни ташкил этган бўлса, 2020 йилнинг 6 ойида 21,5 триллион сўмлик маҳсулот ишлаб чиқарилиб, соҳанинг саноатдаги улуши 16,7 фоизни, ялпи миллий маҳсулотдаги улуши эса 4,6 фоизни ташкил этди. Бу ҳақда қишлоқ хўжалиги вазирлиги ахборот хизмати раҳбари Нигора Хўжаева АОКАда бўлиб ўтган брифингда маълум қилди.

«Бугунги кунда республикада озиқ-овқат саноати соҳасида 12 мингдан ортиқ турли мулкчилик шаклидаги корхоналар, шу жумладан 109та йирик корхоналар фаолият кўрсатмоқда. Жумладан, 1900 та мева сабзавотни қайта ишлаш ва сақлаш, 460 та гўшт ва 800 та сутни қайта ишлаш, 2100 та қандолат маҳсулотларни ишлаб чиқариш, 250 та ёғ-мой корхонлари ва 6500 та бошқа озиқ-овқат маҳсулотларини ишлаб чиқариш корхоналари фаолият кўрсатмоқда. Қайта ишлаш корхоналарининг ишлаб чиқариш қувватларидан фойдаланиш даражаси ўртачадан ҳам паст даражада, хусусан, мева ва сабзавотларни қайта ишлашда – 42 фоиз, сутни қайта ишлашда – 45 фоиз ва гўштни қайта ишлашда – 55 фоиз, ун маҳсулотлари ишлаб чиқаришда – 55 фоиз, ёғ маҳсулотларида – 48 фоиз қувватларидан фойдаланилмоқда. Бунинг асосий сабаби — қишлоқ хўжалиги маҳсулотларини ишлаб чиқарувчилар билан қайта ишлаш корхоналари ўртасида самарали ҳамкорлик ташкил этилмаганлиги, шунингдек айрим корхоналарнинг 60-70 фоиз ускуна ва жиҳозлари маънан эскирганлигида», – деди Нигора Хўжаева.

Шунингдек, соҳани ривожлантириш учун президентнинг 2020 йил 9 сентябрдаги ПҚ-4821 қарори тасдиқланди. Унга кўра:

• мева-сабзавот, гўшт, сут ва бошқа қишлоқ хўжалиги озиқ-овқат маҳсулотларини етиштирувчи (ишлаб чиқарувчи) корхоналар билан ушбу маҳсулотларни қайта ишловчи, тайёрловчи ва реализация қилувчи корхоналар ўртасида ўзаро манфаатли муносабатлар учун шароитлар яратиш;
• маҳаллий озиқ-овқат маҳсулотларининг рақобатбардошлигини ошириш ва уларни диверсификация қилиш, ҳудудларнинг мавжуд табиий ва иқтисодий ресурсларидан унумли фойдаланиш асосида озиқ-овқат саноатини ривожлантиришнинг стратегия ва моделларини ишлаб чиқиш;
• мева-сабзавот, гўшт, сут ва бошқа қишлоқ хўжалиги озиқ-овқат маҳсулотларини қайта ишловчи тадбиркорлик субъэктларини қўллаб-қувватлашнинг молиявий ва номолиявий чоралари — янги воситалар ва ахборот тизимларини яратиш, юқори самара берувчи йўналишларда лойиҳаларни амалга ошириш;
• озиқ-овқат саноатининг ривожланишига хусусий ва тўғридан-тўғри чет инвестициялар оқимининг таъсирини таҳлил қилиш, прогнозлаш ва бу борада тегишли таклифларни ишлаб чиқиш;
• замонавий савдо ва логистика марказларини ташкил этиш, маҳаллий озиқ-овқат маҳсулотларини жаҳон бозорларида илгари суриш, уларнинг рақобатбардошлигини ошириш, экспорт салоҳиятини кенгайтириш ҳамда импорт ҳажмини камайтириш чораларини кўриш бўйича қўшимча вазифалар юклатилди.