Ижтимоий тармоқларда Тошкент кўчаларида катта тезликда Mercedes-Benz эканлиги тахмин қилинган автомобилни бошқараётган йигит акс этган видео тарқалди. Мазкур видео TikTok ижтимоий тармоғига Dilshod_550 номли фойдаланувчи томонидан жойланган. Видеога блогер Никита Макаренко эътибор қаратди ва бу йигит ҳақида ўзининг каналида бир нечта постлар ёзди.
«Потенциал қотил, Дилшод исмли 01К550ХА рақамли автомашина ҳайдовчиси, жарималарни йиғади ва уларни TikTok‘да ғурур билан намойиш этади. Қизиқ, у кимнинг фарзанди экан-а?», — дея ёзган Никита Макаренко фойдаланувчининг автомашинада 150 км/соат тезликда ҳаракатлангани акс этган видео остида.
Бундан ташқари, фойдаланувчи томонидан тармоққа жойланган суратларда у йўл ҳаракати қоидаларини бузгани учун тузилган маъмурий баённомаларни «коллекция» сифатида тўплаши ва ўз саҳифасига жойлаб боришини кўриш мумкин. Фойдаланувчи томонидан Instagram’га жойлаган суратлардан бирининг остига #hokimiyat ҳештеги қўйилган. Суратда йигитнинг хизмат хонасида ўтиргани акс этган. Бундан ташқари, фойдаланувчи 16 февраль куни жойлаган видеода ҳайдовчи Тошкент кўчаларида машинани 150 км/соат тезликка чиқаргани акс этган.
Никита Макаренко мазкур йигит Олмалиқ шаҳар ҳокими Усмон Исмоилович Раҳимовнинг ўғли Исмоилов Дилшод Усмон ўғли эканини аниқлаган.
«Kun.uz»нинг Тошкент вилоят ҳокимлиги матбуот хизмати раҳбари Беҳзод Қобуловга таяниб ёзишича, Олмалиқ шаҳар ҳокими Усмон Раҳимов видеодаги ҳайдовчи унинг фарзанди эканини тасдиқлаган, аммо тармоққа жойланган бу видеоларга «анча вақт бўлган»ини айтган.
«Gazeta.uz» мазкур ҳолат юзасидан Олмалиқ шаҳри ҳокими Усмон Раҳимов билан боғланган. Ҳоким видеода акс этган воқеа 4-5 ой олдин содир бўлганини маълум қилган.
«Ўшанда у бунинг учун жаримага тортилганди. Тезликни оширгани учун мен унга рулга ўтиришни тақиқладим. У 3-4 ойдан буён автомобиль бошқармаяпти. Машина Tracker эди, Mercedes-Benz эмас. Шунчаки машинага Mercedes-Benz’нинг рули ўрнатилганди. Tracker машинаси Nurafshon Avtocentr автосалонидан кредитга олинганди, ҳозирча машина қийматининг ярми тўланган. Биз машинани сотмоқчи эдик, бироқ тўланмаган кредит сабабли бу ишни қила олмадик», — дея маълум қилган шаҳар ҳокими.
Ҳокимнинг сўзларига кўра, машина Дилшод Исмоилов кичик укасини Тошкентга ўқишга олиб бориб келиши учун кредитга олинганди. Ҳокимнинг айтишича, ҳозирги кунда автомобилни ишончнома асосида Ғайрат Бакдавлетов бошқармоқда.
«Ўғлимнинг ҳаракати, албатта, нотўғри. Билмадим, балки мен нотўғри тарбия бердимми? Мен бирор марта сўкмаганман, унга қўл кўтармаганман. Бизнинг оиламизда ҳеч ким ичмайди, чекмайди. Мен юзага келган вазиятдан жуда афсусдаман. Ўзим Олмалиқ ҳокими бўлиб ишлайман. Оилам билан кўришиш учун ҳафтада бир марта уйга бораман. Ўғлим чекмайди, ичмайди. Тан оламан, у тезликни оширган, шунинг учун энди рулга ўтирмаяпти», — дея таъкидлаган Усмон Раҳимов.
Эслатиб ўтамиз, 2019 йилнинг июль ойида «Озодлик» радиоси Ўзбекистон Президентининг кенжа куёви Отабек Умаровнинг Instagram-аккаунти Stories бўлимида жойлаштирилган видеони эълон қилганди. Видеода Отабек Умаров Тошкент кўчаларида Tesla автомобили тезлигини соатига 201 километргача чиқарганини кўриш мумкин. Кейинроқ Отабек Умаров тезликни оширгани учун 1,8 миллион сўм жарима тўлаганини маълум қилганди.
Изоҳ (0)