Хоразм вилояти Хива шаҳрида ҳар икки йилда бир марта «Лазги» халқаро рақс фестивали ташкил этилади. Бу ҳақдаги қарор Президент томонидан имзоланди, деб хабар бермоқда ЎзА.
Қарорга кўра, 2022 йилдан бошлаб ҳар икки йилда бир маротаба 25—30 апрель кунлари Хива шаҳрида «Лазги» халқаро рақс фестивали ҳамда халқаро илмий-амалий конференцияни ўтказилади. Масъул ташкилотлар фестивални ЮНЕСКО шафелиги остида ўтказиш чораларини кўради.
Қарор билан фестивални ўтказиш тартиби тўғрисидаги низом ҳам тасдиқланди. Низомга кўра, «Лазги» рақс танлови 3 та номинация («Энг яхши яккахон рақс ижрочиси», «Энг яхши рақс жамоаси» ва «Энг яхши саҳналаштирилган рақс») бўйича баҳоланади.
Танлов ғолиблари қуйидаги миқдорда пул мукофотлари билан тақдирланади:
- Гран-При — 7000 доллар;
- 1-ўрин — 5000 доллар;
- 2-ўрин — 3000 доллар;
- 3-ўрин — 2000 доллар.
Эслатиб ўтамиз, ЮНЕСКОнинг номоддий меросни асраш ҳукуматлараро қўмитасининг 2019 йил 12 декабрь куни бўлиб ўтган 14-сессиясида «Лазги» рақси Инсоният номоддий мероси репрезентатив рўйхатига Ўзбекистон маданий меросининг таркибий қисми сифатида киритилганди.
Изоҳ (0)