Andijon viloyatining Bo‘ston tumanida eski va qarovsiz bino 22 kun ichida qayta ta’mirlanib, Davlat xizmatlari markaziga foydalanishga topshirildi. Bu haqda “Daryo”ga DXA Andijon viloyat boshqarmasi axborot xizmati xabar berdi.
Boshqarma axborot xizmatining xabar berishicha, Davlat xizmatlari markazlarining turli tashkilot va idoralar binolarida joylashganligi aholiga ko‘plab noqulayliklar keltirib chiqargan. Shu sabab Prezidentning Davlat xizmatlari markazlari binolarini davlat-xususiy sheriklik shartlari asosida qurilishini tashkil etish yuzasidan qarori qabul qilingan bo‘lib, ayni paytda ushbu hujjat ijrosi asosida hududlarda markazlarni qurish ishlari boshlab yuborilgan.
Qayd etilishicha, Bo‘ston tuman Davlat xizmatlari markazi bir kunda o‘rtacha 100-150 nafar fuqaroga xizmat ko‘rsatadi. Markazning eski binosi tuman Xalq qabulxonasi binosida joylashganligi sababli ko‘zda tutilgan standartlarga javob bermas edi. Bu esa noroziliklarga sabab bo‘lgan.
Yangi ta’mirlangan binoda barcha sharoitlar yaratilgan bo‘lib, markaz zarur texnik jihoz va vositalar bilan ta’minlangan. Ayni kunda binoda jismoniy va yuridik shaxslarga 140 dan ortiq davlat xizmati ko‘rsatilmoqda. Markazda bir vaqtning o‘zida 10 nafar, bir kunda 200 nafar fuqaroga xizmat ko‘rsatish imkoniyati yaratilgan.
Ta’kidlanishicha, 2020-yilning 10-avgust kuni Andijon viloyati hokimi Shuhrat Abdurahmonov ishtirokida bo‘lib o‘tgan apparat yig‘ilishida viloyat rahbari 13 ta shahar va tuman hokimlariga 2020-yil oxiriga qadar Davlat xizmatlari markazlariga alohida, yangi bino berish yoki davlat-xususiy-sherikchilik asosida alohida bino qurish topshirig‘ini bergan. Bo‘ston tumani hokimi Sadbarxon Mamitova tomonidan ushbu topshiriq 22 kunda bajarilgan.
Izoh (0)