Флорида ҳукумати коронавирус COVID-19 тарқалишини олдини олиш учун киритилган барча чекловларни бутунлай бекор қилишга қарор қилди, деб ёзади The Hill’га таяниб «Интерфакс».
Флорида штати губернатори Рон Десантис матбуот анжумани чоғида штатда барча чекловлар бекор қилинганини маълум қилди. Таъкидланишича, расмийлар штатда COVID-19 билан касалланиш сонининг кўпайишига тайёр.
Чекловларнинг бекор қилиниши, биринчи навбатда, COVID-19 эпидемияси пайтида бир неча марта ёпилган ва қайта очилган бар ва ресторанларга тааллуқли. Десантиснинг тушунтиришича, агар маҳаллий ҳокимият идоралари корхоналарга ишлашга кетадиган ходимлар сонига чекловлар киритмоқчи бўлса, бунинг учун иқтисодий ва тиббий асосларни тақдим этиши керак.
Бундан ташқари, Десантис футбол жамоаларини мухлисларнинг ўз стадионларига киришига рухсат беришни бошлашга чақирди.
Шу билан бирга, губернатор коронавирус ҳали ҳам катта муаммо эканлигини тан олди. Бироқ унинг сўзларига кўра, давлат инфекцияни назорат қилиш учун етарлича тайёр.
Флорида июль ойида коронавирус инфекциясининг тарқалиши чўққисига чиқди. Умуман олганда, штатда деярли 700 минг кишига коронавирус ташхиси қўйилган. 14 мингга яқин бемор вирус оқибатида вафот этди.
Жонс Ҳопкинс университетининг маълумотларига кўра, АҚШда 7 048 285 та касаллик ҳолатлари аниқланган. Беморларнинг 2 727 335 нафари соғайган, 204 093 нафари эса вафот этган.
Изоҳ (0)