Florida hukumati koronavirus COVID-19 tarqalishini oldini olish uchun kiritilgan barcha cheklovlarni butunlay bekor qilishga qaror qildi, deb yozadi The Hill’ga tayanib “Interfaks”.
Florida shtati gubernatori Ron Desantis matbuot anjumani chog‘ida shtatda barcha cheklovlar bekor qilinganini ma’lum qildi. Ta’kidlanishicha, rasmiylar shtatda COVID-19 bilan kasallanish sonining ko‘payishiga tayyor.
Cheklovlarning bekor qilinishi, birinchi navbatda, COVID-19 epidemiyasi paytida bir necha marta yopilgan va qayta ochilgan bar va restoranlarga taalluqli. Desantisning tushuntirishicha, agar mahalliy hokimiyat idoralari korxonalarga ishlashga ketadigan xodimlar soniga cheklovlar kiritmoqchi bo‘lsa, buning uchun iqtisodiy va tibbiy asoslarni taqdim etishi kerak.
Bundan tashqari, Desantis futbol jamoalarini muxlislarning o‘z stadionlariga kirishiga ruxsat berishni boshlashga chaqirdi.
Shu bilan birga, gubernator koronavirus hali ham katta muammo ekanligini tan oldi. Biroq uning so‘zlariga ko‘ra, davlat infeksiyani nazorat qilish uchun yetarlicha tayyor.
Florida iyul oyida koronavirus infeksiyasining tarqalishi cho‘qqisiga chiqdi. Umuman olganda, shtatda deyarli 700 ming kishiga koronavirus tashxisi qo‘yilgan. 14 mingga yaqin bemor virus oqibatida vafot etdi.
Jons Hopkins universitetining ma’lumotlariga ko‘ra, AQShda 7 048 285 ta kasallik holatlari aniqlangan. Bemorlarning 2 727 335 nafari sog‘aygan, 204 093 nafari esa vafot etgan.
Izoh (0)