Ўзбекистон Соғлиқни сақлаш вазирлиги мамлакатнинг COVID-19’га қарши эмлаш жараёнида иштирок этиш учун нималар қилаётгани ҳақида маълумот берди.
Вазирлик хабарига кўра, коронавирусга қарши вакцина ишлаб чиққан Хитойнинг икки компанияси вакциналар клиник синовларининг учинчи босқичини Ўзбекистонда биргаликда амалга оширишни таклиф қилди. Инновацион ривожланиш вазирлиги Хитойнинг Sinopharm ва Zhifei Longcom компаниялари билан келишув имзолади.
Бундан ташқари, Ўзбекистон «Спутник-V» вакцинасининг 5000 дозасини ажратиш юзасидан Россиянинг тўғридан-тўғри инвестициялар жамғармасига мурожаат қилди.
Шунингдек, 25 сентябрь куни Россия тўғридан-тўғри инвестициялар фонди (РТИФ) Ўзбекистонга 35 миллион доза «Спутник V» вакцинасини етказиб бериш бўйича LAXISAM фармацевтика компанияси билан келишувга эришганини маълум қилди.
«Ўзбекистондаги назорат органлари томонидан рухсат берилгач, 2020 йилда республикага 10 миллион дозагача, 2021 йилда эса яна 25 миллион доза вакцина етказиб берилиши мумкин», — дейилади фонд матбуот хизмати хабарида.
ССВ Ўзбекистон Жаҳон соғлиқни сақлаш ташкилотининг COVAX (коронавирусга қарши вакциналаш) халқаро механизмига қўшилганини эслатиб ўтди. Агар вакцина муваффақиятли ишлаб чиқилган бўлса, COVAX механизмида иштирок этадиган мамлакатлар аҳолисининг 20 фоизини эмлаш учун етарли вакцина таъминотига кафолатланган дастлабки кириш имкониятдан фойдаланилади
Вазирлик, шунингдек, Ўзбекистонда вакциналарни ишлаб чиқаришни йўлга қўйиш олимлар ва фармацевтика соҳаси ишлаб чиқарувчилари томонидан кўриб чиқилаётганини қайд этган.
Аввалроқ Ўзбекистон COVID-19 вакцинаси клиник синовларининг барча босқичи якунланмагунича уни сотиб олмаслиги маълум қилинганди. Август ойи бошларида Шавкат Мирзиёев коронавирусга қарши вакцинани харид қилиш масаласини ўрганишга бир ҳафта муддат берганди. Президент топшириғига биноан вакцинани харид қилиш ва мамлакат аҳолисини эмлашни амалга ошириш йўлларини ўрганиб чиқиш мақсадида етакчи олимлар ва тажрибали шифокорлардан иборат ишчи гуруҳ тузилган.
Изоҳ (0)