Навоий вилоятининг Хатирчи туманида яшовчи фуқаро фарзандли бўлгач, 19 ёшида туғилганлиги ҳақидаги гувоҳномага эга бўлди. Бу ҳақда «Дарё»га Хатирчи тумани ФҲДЁ бўлими мудираси Манзура Қўлдошева хабар берди.
2001 йилда туғилган хатирчилик Наргиза Ҳайдарованинг билдиришича, у эътиборсизлик туфайли 19 ёшга киргунга қадар туғилганлиги тўғрисидаги гувоҳномани ололмаган.
«Ота-онам шаръий никоҳда яшашган. Отам вафотидан сўнг эса менга туғилганлигим тўғрисидаги гувоҳномани олишнинг имкони бўлмаган. Орадан йиллар ўтди, улғайдим. Туғилганлик тўғрисидаги гувоҳномам бўлмагани учун фуқаролиги йўқ одамлар қаторида никоҳ гувоҳномасисиз самарқандлик йигитга турмушга чиқдим. Фарзандимиз дунёга келди. Ўзимизда туғилганлик ҳақидаги гувоҳнома бўлмагани боис туғилган фарзандимизга ҳам гувоҳнома олиш масаласи муаммо бўлди», — дейди фуқаро Наргиза Ҳайдарова.
19 ёшли фуқаро Хатирчи тумани ФҲДЁ бўлимига мурожаат қилгач, йиллар давомида ечимсиз қолаётган муаммо Давлат хизматлари агентлиги вилоят бошқармаси орқали суд аралашуви билан бартараф этилган. 2001 йилнинг 27 февралида дунёга келган Наргиза Ҳайдаровага туғилганлик ҳақида гувоҳнома топширилган.
Қўшимча қилинишича, 2020 йилнинг ўтган 8 ойи мобайнида Наргиза Ҳайдарова сингари фуқароларнинг 43 нафарига муддати ўтган туғилиш ҳолати қайд этилган ҳамда 3155 та туғилиш, 909 та никоҳ расмийлаштирилган.
Изоҳ (0)