АҚШнинг Нью-Йорк шаҳридаги Бруклин мавзесида «Зиё Арт» ўзбек мактаби иш бошлади. Бу ҳақда Ташқи ишлар вазирлиги матбуот хизмати хабар берди.
Унинг расмий очилиш маросими 2020 йил 19 сентябрь куни бўлиб ўтган. Тадбир Ўзбекистоннинг Нью-Йоркдаги бош консулхонаси ва «Маҳалла USA» диаспора ташкилоти билан биргаликда ташкил этилган.
Бош консулхона маълумотларига кўра, мактаб 16 Avenue O, Brooklyn NY 11204 манзилида жойлашган бўлиб, ўзбек тили ва адабиёти, одобнома, тасвирий санъат, шахмат ва математика фанлари бўйича машғулотлар олиб борилади.
Дарслар шанба ва якшанба кунлари ўзбек тилида Ўзбекистондан олинган махсус ўқув материалларидан фойдаланган ҳолда малакали ўқитувчилар томонидан олиб борилади. Ўқитувчилар танлов асосида саралаб олинган.
Ўзбекистон ҳукумати номидан ўзбек мактаби кутубхонаси фондига китоблар ва бадиий адабиётлар топширилган.
Изоҳ (0)